uMthunywa
Silo Pumulani Mpofu
Banengi omama abahlezi ezindlini bethi izindlu ngezabo ikanti izindlu zingezabomkabo. Izikhathi ezinengi omama bakholwa ukuthi indlu kumele ibhaliswe ebizweni likababa loba beyithenge ndawonye. Lokhu kuvele kusukela esikweni lendulo lokuthi owesintwana ungaphansi komyeni wakhe, ngakho lanxa into zithengwa zifakwa ebizweni lakhe kabasananzeleli ukuba lezozinto ngomthetho sezingezikababa.
Nxa sikhuluma ngendaba zezindlu kumbe zama-properties banengi omama ababa lenkinga ngoba yonke into iyabe isebizweni lomkakhe. Ngenxa yokungananzeleli esikhathini esinengi omama basala bengela lutho nxa imitshado isichitheka kumbe nxa ubaba esekhethe ukutshiya umuzi ayethatha omunye umama.
Kule iviki ngihlangane lomama okade elenkinga yokuba yonke into ibisebizweni lomkakhe loba nje leyompahla bayithenga ndawonye. UThandiwe Moyo wayethethwe nguMoses Sibanda. Laba ababili baba lendlu edolobheni lomuzi ekhaya. Ngenxa yokulandela isiko lokuba yinhloko yomuzi yonke impahla yafakwa ebizweni lomkakhe.
Bahlalisana yonke into ihamba kuhle, kwathi ngemva kweminyaka ethile behlezi ndawonye sebelabantwana abakhulileyo zaqala ukuguquka izinto.
Wahamba wajika itshoba ubaba wangazwakali ukuthi uthini ngoThandiwe. UThandiwe wasala ezihlalele emzini wabo, abantwana labo bakhula baqala ukulungisa ezabo impilo. Wathutsha ubaba wafika wathengisa zonke izifuyo ezazikhona ekhaya wahamba ethi yena selomunye umuzi. Umama wasala engelalutho waqala kutsha ukudinga izifuyo wancediswa ngabantwana.
Kodwa ngokufanayo kasatshintshanga ibhuku lenkomo lahlala lilokho lisebizweni lomkakhe ngoba ezitshela ukuba akuqakathekanga ngoba inkomo ezithenga ngemali yakhe ubaba lo obemthethe engekho.
UThandiwe wasebona kufanele ukuthi abhale incwadi yokwaba ilifa ukwenzela ukuthi abantwabakhe nxa kukhona okungamehlela bona bengathwali nzima ubaba wabo sebuya ethi uzothatha izinto lezi unina azisebenzela yedwa ngemva kokufulathelwa yindoda.
Wathi uThandiwe efika eTrinity Project ethi ufuna uncedo lokuba abhale incwadi yokwaba ilifa wasebuzwa ukuthi ingabe ulayiphi impahla waqamba izifuyo, umuzi, lendlu esedolobheni kanye lemota athi wayithengelwa ngumntwana.
Umbuzo owalandelayo ngowokuthi impahla yonke le ayibalisileyo isebizweni lakhe na? Yikho lapho olwamtshaya lwameqa uvalo esesizwa ukuba ngenxa yokuthi impahla yonke le ayikho ebizweni lakhe kutsho ukuba yena akalalutho ngakho kumele akuqondise lokhu isikhathi singakadliwa ngumangoye.
Okokuqala kwakumele ayetshintsha impahla ibesebizweni lakhe ngokufanayo atshintshe lebhuku lenkomo libe sebizweni lakhe konke lemota athi wayithengelwa ngumntwana ngoba nxa engakwenzanga lokhu uMoses ulakho ukubuya njalo afike athengise yonke impahla lezifuyo ngoba lezi zinto zisebizweni lakhe okuyabe kuveza ukuba impahla ingeyakhe.
Iseluleko sami kini kule iviki sithi nxa abantu abathetheneyo bethenga impahla kumbe indlu bendawonye kababhalise amabizo abo bobabili ukuze kube sobala ukuba lezizinto ngezabo bobabili hatshi ukuthi zibhalwe ibizo linye.
Asihlanganeni kuviki ezayo.
Umlobi uthinteka ku trinitytrust6gmail.com, www.trinityproject.biz, 0773195055, 09881508.
