uMthunywa
(Inhloko likhanda lenkomo/imbuzi/ingulube loba imvu)
NGAMASIKO ethu inhloko ibidliwa ngubaba/ amadoda hatshi omama njalo hatshi indoda eyodwa kodwa amadoda.
Inhloko le ibiphekwa ngamadoda hatshi abesifazane. Esinye sezizatho yikuthi obaba yibo inhloko yomuzi kawukho umuzi okhokhelwa ngumama, kwakuzila. Lamuhla izinto ziyaphenduka. Wena uzayidla yini inhloko wenze yonke imicimbicimbi yenhloko.
Indoda ehlabileyo kumbe ethenge inhloko yiyo efanele ukumema ukunxusa amanye amadoda ukuthi abazoyidla ndawonye nansi inhloko isikhona ekhaya.
Sokufanele umnumzana ayilungisele ukuthi iphekwe ize futhi idliwe.
Okokuqala yikuhlinza isigogo sayo sonke abeseyihlahlela, akhuphe impondo zayo zonke akukho imbiza engelisa ukuzingenisa phakathi kwayo.
Khathesi usezayiqhekeza phakathi ngokulinganayo. Ngokunanzelela okukhulu ulimi luyakhutshwa nxa lulokhu lukhona lugeziswe lubekwe lodwa laphaya.
Kodwa-ke izitho lezi zombili zingaphekwa ndawonye kumbe zehlukaniswe zonke nje. Zazidliwa ngamadoda hatshi abesifazane.
Lamuhla kuyenzakala lokhu kuzindawo ezehlukeneyo kungaba emakhaya kumbe khona kanye emadolobheni khona kanye emalokitshini.
Imvelo yimvelo kufanele siyihloniphe njalo siyigcine ngoba itshengisa ubuntu besizwe lenhlonipho yaso lokuba yiso baso. Silahlekelwa yizibusiso zemvelo ngokuba ngothathekile ngokulandela amasiko abanye size sithi aphucukile.
Okudingakalayo
a)Inhloko elungisiweyo
b)Imbiza lephini, isawudo, ibilebile le-pepper
Ukupheka
a)Qala ngokugezisa inhloko ngamanzi aqandayo uthintithe amathanjana abangelwe yikuhlahlelwa.
b)Gezisa ulimi.
c)Faka inhloko ngaphansi embizeni ubusubeka ulimi phezulu.
d)Thela amanzi alingeneyo lesawudo.
e)Pheka ngokunanzelela ubone ukuthi iyavuthwa ingaphihliki amathambo.
f)Ekuvuthweni bona ukuthi kusala kulomhluzana olingeneyo.
Ukudliwa kwenhloko
a)Qalani ngokugeza izandla.
b)Phakululela emganwini omkhulu uhlephune amaqatha alingeneyo uwafake emiganwini eyehlukeneyo.
c)Hluba isigogo solimi ubususika amaqatha uwafake lawo emganwini, singaba khona isitshwala sokudla kulaba abasifunayo. Ngemvelo kwakudliwa inyama yodwa.
