uMthunywa
Pumulani Mpofu
KUNHLANGANISO yeTrinity siyajabula kakhulu nxa abantu sebethe bathola incwadi zokuzalwa, incwadi yokufa loba izithupha, izithupha zomtshado kanye lelifa labo. Kuyasijabulisa kakhulu ngoba siyabe sibona ukuthi abantu bayawuthakazelela umsebenzi wethu. Kuyabe kusitshengisa lokuthi abantu bayazehlisa ngoba ungabona umuntu eseze ebuya ezoxoxisana lawe ngohlupho lwakhe, kutshengisa ukuzehlisa lokukwethemba. Nxa esethole lokho ayekuswela uyabe usukwazi ukuthi lokhu owamxwayisa khona wakulalela.
Iqiniso elikhona yikuthi inengi labazali alikunanzeleli ukuqakatheka kwencwadi yokuzalwa kodwa ukusweleka kwayo kudala ukuthi umntwana aswele indawo esikolo. Loba usuthe wayithola imihloliso kaGrade Seven leye O-level awuyilobi. Nxa ungabhalanga i O-level awenelisi ukuthi uye emakolitshini kumbe eUniversity ukuze ufunde uqeqetshe ukwenzela ukuthi ube lempilo engcono. Nxa kungowesifazana ongela ncwadi yokuzalwa kenelisi ukuthi athathe isithupha okumenza acine esehluleka ukuthathela abantwabakhe incwadi zokuzalwa.
Ngake ngathola ithuba lokuxoxisa labomama abasebenzela kuWadi 18 bekuChild Protection Committee. Omama laba nguMaMhlanga lomunye wakhe. Njengoba bekwazi phose zonke intandane ezihlala kule indawo, bangibikela ukuthi kulenye ethiwa nguAziza Khumalo eyatshiywa ngabazali. Unina benelisa ukumthathela incwadi yokufa kwathi uyise kasathathelwanga incwadi yokufa.
UAziza yindodana eleminyaka elitshumi lasithupha ekhangelele ukuthi ilobe imihloliso yayo ye O-Level lonyaka.
UAziza ababalisi bakhe bathi ngumfundi okhaliphileyo okumangalisayo ngoba le-report yakhe eyomnyaka ophelileyo iyakuveza lokhu.
UAziza uhlala logogo owabona kumfanele ukuthi amnakekele, nguye njalo omenzela konke akudingayo. UAziza wazalelwa kwele South Africa njalo ihealth card yakhe ulayo, lencwadi yokufa kukanina ulayo. Owayekuswela yisihlobo sikanina esingayamfakazela ukuthi yena nguye umntakamufi lowu oku death certificate. Isihlobo ayesazi ngugogo ozala unina ohlala eNjube onguye owayengamncedisa ukuthi athole incwadi yakhe yokuzalwa ukwenzela ukuthi alobe imihloliso yakhe ye O-Level.
Umama uMaMhlanga wabona kufanele ukuthi ayekhulumisana logogo kaAziza owaqala wala kodwa bathe sebebuye lepholisa selimchasisele ngokuqakatheka kokuphatheka kwakhe ekuthatheleni uAziza incwadi yokuzalwa wavuma ukuphathisana lezakhamuzi ezikhathalele ukusiza umzukulu wakhe.
UMaMhlanga njengoba wayele health card ka Aziza, incwadi zezikolo lapho afunda khona ezazichaza ukuthi ubefunda engela ncwadi yokuzalwa, incwadi yokufa kanina kanye lesithupha, lendleko ezazifuneka. UMaMhlanga lomngane wakhe babelakho bonke bafika bachaza ukuthi bona bavela ngaphi emahofisini kahulumende babancedisa.
UAziza sezakwenelisa ukuthi athole incwadi yakhe yokuzalwa alobe imihloliso yakhe ye O-Level. Sikufisela konke okuhle Aziza. Sithanda ukukhuthaza amaChild Protection Committees ukuthi asizane labantwana abasezigabeni ezitshiyeneyo ukuthi labo abangela ncwadi zokuzalwa benelise ukuzithola. Sithanda ukubonga ugogo osizana loAziza ngokuzimisela ngokugcina uAziza lokumnakekela, uMaMhlanga leChild Protection Committe kaWadi 18 sibatshayela ihlombe ngomsebenzi omuhle abawenzayo. NjengeTrinity sithi lingakwenzi kuAziza kuphela kodwa ebantwaneni bonke.
Asihlanganeni ngeviki elizayo.
Umlobi uthinteka kukheli ethi [email protected] Laku nombolo ezithi 0773195055/09881508.
