uMthunywa
Brandon Moyo
IQEMBU lekhilikithi leTuskers lizabe likhangelele ukuncediswa ngabalandeli balo koBulawayo lapho bekhangelele ukudlala leqembu leSouthern Rocks emdlalweni weLogan Cup ozaqalisa lamuhla eQueens Sports Club edolobheni lakoBulawayo.
Umdlalo lo oqala lamuhla kuzabe kungowokuqala weTuskers ukudlalelwa koBulawayo, enkundleni yabo yasekhaya iQueens Sports Club lokhe kwaqala isizini yeLogan Cup ka 2023/24 ekuqaleni kukaMpalakazi ngomnyaka ophelileyo.
Imidlalo yonke esidlalwe yiTuskers ibisedolobheni leHarare njalo ukubuya kwabo koBulawayo kuzabanika ithemba lokunqoba. Abaphathi bomdlalo wekhilikithi koBulawayo sebecele abalandeli ukuthi bahambe enkundleni ngobunengi babo bayesekela iqembu labo, babanike intshukuntshu.
Abalandeli bekhilikithi bathenjiswe umdlalo wezinga eliphezulu, njalo umdlalo weFirst Class ochazayo.
Ukudlalela phambili kwabalandeli babo kuzalincedisa iqembu leTuskers elisebunzimeni ekuzameni kwabo ukunqoba umdlalo wokuqala kule sizini.
ITuskers yilo lodwa iqembu elingakanqobi kuLogan Cup njalo lihlezi emsileni kusigaba samaqembu amahlanu. Iqembu lakoBulawayo lilemiklomelo engamatshumi amane lane (44), lilandela eleRhinos elilemiklomelo engamatshumi ayisithupha (60). I-Southern Rocks, edlala leTuskers lamuhla, ihlezi endaweni yesibili lama-points angamatshumi ayisitshiyagalombili lane (84).
I-Mega Market Mountaineers yiyo ekhokhelayo ngamaphuzu angamatshumi ayisitshiyagalolunye lasikhombisa njalo yilo lodwa iqembu elingakanqotshwa kulisizini.
ITuskers izabe ikhangelele kubadlali abafana loBrian Chari oselesikhathi eside edlala ikhilikithi njalo inkundla yeQueens Sports Club uyijayele kakhulu. UChari kuma-innings ayisitshiyagalombili usetshaye ama-runs angu-338 nge avaleji ye42,25.
Omunye otshaya ama-runs azwayo kuTuskers ozabancedisa kumdlalo walamuhla nguAliakbar Hamid.
UHamid usetshaye ama-run angu 332 kuma innings ayisitshiyagalolunye le avaleji ye-41,50. Ngebhola esandleni, abanye babadlali abathembisayo kuqembu leTuskers nguMamoon Riaz loTinotenda Maposa okuyibo abathethe amawikhethi amanengi ukudlula abanye eqenjini labo.
Umdlalo weTuskers leSouthern Rocks kayisuwo wodwa ozadlalwa lamuhla kuLogan Cup. Edolobheni leHarare, enkundleni yeTakashinga Cricket Club, iRhinos izabe idlala le Eagles. Imidlalo yomibili izaqalisa ngo-10 ekuseni.
