uMthunywa
KUNZIMA enkambeni yeOrlando Pirates ukuzwa ukuba iMamelodi Sundowns isikhangele isicoco seligi kusasele umdlalo owodwa kuphela.
Lalokho okwakhulunywa ngumqeqetshi weCape Town City uBenni McCarthy sekuvela nanko iSundowns itshaye iGolden Arrows 2-0 ngoLwesibili.
UMcCarthy uthe akayiboni i-Orlando Pirates inqoba isicoco seligi ngemva kokuthi ezakhe ziyincitshe imiklomelo emithathu emdlalweni we-Absa Premiership wangempelasonto edluleyo.
Iqembu likaMcCarthy, iCape Town City, liyibambe nge 2-2 iPirates ebidinga ukunqoba ukuze kubelula ukuthi iqede iphezulu.
Njengokubika kwephephandaba likazulu, uMcCarthy wakutsho ukuba ufuna ukuyiphazamisa iPirates embangweni ekuwo.
Ngemva komdlalo uxolisile kubalandeli beBucs ngakwenzileyo kodwa waqhubeka ngokungaliniki lutho iqembu laseMayfair empini yenkezo yeligi.
Ebuzwa uMcCarthy ukuthi yiliphi iqembu abona lizathatha isicoco phakathi kweZimnyama leSundowns, uthe: “Ngihamba leSundowns. Ngibona bezoba yingozi kakhulu (ngemva kokuphuma kuCaf Champions League). Baleqembu elikhulu abangakwazi ukulitshintsha ngendlela abafisa ngayo. Ngakho ngibona iSundowns kuyiyo esesimeni esingcono.”
Ukholwa ukuthi umqeqetshi weMamelodi Sundowns, uPitso Mosimane, uyazi okumele akwenze njengamanje.
“Ngithemba ukuthi ngelinye ilanga abalandeli bePirates bazangixolela kodwa lami ngidlalela ukugcina umsebenzi wami,” kutsho uMcCarthy.
Ngesizini edluleyo obekungeyokuqala kuMcCarthy njengomqeqetshi, iCity iqede endaweni yesihlanu.
Njengamanje ibambe indawo yesine kulogu kanti uMcCarthy ubona ukunyuka loba ngendawo eyodwa kungatsho ukukhula kuye. Unqobe isicoco sokuqala eqeqetsha bethwala inkezo yeMTN 8.
Ngokunjalo, izimanga ezigilwe ngumgadli weBafana Bafana, uPercy “Young-Lion” Tau, zizokhukhumeza umqeqetshi weqembu lesizwe obona ukuba lumdlali uzabaluleka mhla besiyancintisa kunkezo ye-2019 Africa Cup of Nations (Afcon) ese-Egypt kusukela ngoNhlangula 21 kusiya kuNtulikazi 19.
