uMthunywa
YiNtatheli kaMthunywa
ISIZINI yenguqu yeCastle PSL ingakayindawo, iqembu leHwange FC seliziphosele amehlo, nanko phela umqeqetshi walo uMabelo Njekwa usebike ngokungesabi ukuthi uzalwela ukuhluthuna inkezo, loba nje ebhaxabulwe yiHighlanders kumdlalo wokuqla isizini.
Abafana beChipangano basele bekhamisile ngokuhlohlwa amabhola amathathu phakathi kwemizuzu elitshumi egumeni labo leColliery ngeSonto.
Ukunqotshwa kweHwange lokhu kuveze ukuthi ukuswelakala kukaNation Dube kuzadala ukuthi ithimu le idonse nzima kulisizini. UDube nguye obebambe intambo kuleliqembu anduba amiswe umsebenzi ngoba ecatshangelwe ukuthi uyingxenye yalabo abathengisa ithimu yamaWarriors.
UNjekwa ubengumqeqetshi ophezulu weChipangano ngemva kwalokhu. Umdlalo wangeSonto ubengowokuqala kuye ukuthi akhuze ithimu.
Kungxoxo abelayo loMthunywa ngoLwesibili uNjekwa uthe ukunqotshwa kwakhe kumdlalo wokuvula isizini akutsho ukuthi yena uyasilela, kodwa yikwehluleka kwabadlali bakhe ukuthi bavalele iHighlanders emuva.
“Kwehlule ukuthi sivimbe ngokupheleleyo kumdlalo wethu wakuqala sileHighlanders.”
Akulamuntu ongamsola uNjekwa ngokwehlukela kwakhe labadlali ngoba abadlali balithimu sebehlale isikhathi eside bengaholi.
UNjekwa uthe angeke atsho okunengi ngemali ephiwe abadlali bakhe.
Iphephandaba likazulu lixoxe labadlali abathathu abakufake mgceke ukuthi ukulamba kwabo yikho okuzadlisa ithimu.
“Singabe sadliwa yiHighlanders kodwa inkokheli zethu kumele zikhunjuzwe ukuthi sidlala silambile,” kutsho omunye umdlali ozifihlileyo.
Ukukhalaza kwabadlali beHwange kuvela ekuthini abanikazi bethimu inkampani yeHwange Colliery iyehluleka ukuhlawulela indleko zethimu leholo labadlali.
Iqembu leli lehluleke lokudinga abadlali abasacathula kumbe ithenge abadlali abavela kwezinye indawo.
Ukunqotshwa kumdlalo wakuqala okwenziwe yiHwange, kuyisiqalo kulithimu esijwayele ukuhlasela ngokunqoba, ibisisehluleka phambili.
Ebuzwa ngalokhu uNjekwa uthe kulisizini kuzakuba lomahluko.
“Ungakhumbula ukuthi ngomnyaka ophelileyo sidonsa nzima kodwa ngokuqhubeka kwesizini, sacina sikunombolo engcono.
“Abadlali bayazi ukuthi ukuwa kwethimu yikuwa kwamabizo abo.”
IHwange yilo lodwa iqembu elingazange lizihluphe ngokuthenga abadlali. Ngokuzwa kukaMthunywa, isizatho yikuthi inkokheli zethimu sezifuna ukuthi kudlale abafana abadabuka esigabeni seHwange kuphela. Okunye yikuthi iqembu aliselamali njalo abadlali babhadalwa ngemva kwesikhathi eside.
