uMthunywa
AMAQEMBU ayisithupha adlala imidlalo etshiyeneyo akhengelelwe ukuthi adibane kumbuthano weHealth and Ubuntu Gala elokitshini leMagwegwe ngeviki elizayo.
Umbuthano lo oqoqwe yinhlanganiso yeBambanani Community Development Initiatives (CDI) kubikwa uzaqhutshwa ngenhloso yokukhuthaza uzulu ukuthi akhuthalele ukuphatheka kwezemidlalo lemisebenzi eyakha umzimba. Imincintiswano le iza ngesikhathi inhlanganiso yeBambanani ifikisa iminyaka eyisithupha lokhe yasungulwa.
Ekhuluma lephephandaba likazulu mayelane ngaloluhlelo, olilunga lekhomithi ebambe uhlelo eMagwegwe uGift Marimira uthe abasakhulayo elokitshini labo bazancintisan kumidlalo yenguqu loqaqa.
“Amaqembu ayisithupha azancintisana mhla welanga lapho okuzaphinda kube lomthimba wonikeza izicoco kumidlalo ezadibanisa amaqembu awomdlao wokuqaga lebhola.”
Isikhulumi lesi sichazele iphephandaba likazulu ukuba umbuthano wabo uzakuba lemvuzo le ezagoqela amahawu, inkomitsho, imendulo lempahla ezithile.
“Eminye imvuzo ezakuya kulabo abenze kuhle ekulondolozeni imvelo kunhlelo ezitshiyeneyo eMagwegwe.
“Sibeka isicelo kulabo abangenelisa ukuthi basincedise ukuze umbuthano wethu uphumelele.”
Nyakenye umthimba ofanayo uqhutshwe enkundleni zeMagwegwe Youth Centre lapho obeluhlangene khona lengatsha zikaHulumende ezemidlalo. Inhloso ebimqoka bekuyikuphakamisa lokukhankasela imsebenzi yokwenqabela ukumemetheka kwengculazi, ufuba lemvukuzane.
