uMthunywa
YiNtatheli kaMthunywa
UMDLALO we-basketball ukhula ngamandla koBulawayo ngokwanda kwabadlali lamaqembu akhwabitha lumdlalo asebike ukuba afuna ukuba yingxenye yeBulawayo Basketball Association (BBA).
Lokhu kuvele ngempelaviki edluleyo emhlanganweni wamalunga enhlanganiso yeBBA ngesikhathi kuhlaziywa isimo sesizini edluleyo lokuqoqa amalungiselelo esizini entsha ekhangelelwe ukuqala mhlaka 7 Mfumfu.
Ekhuluma lentatheli kaMthunywa ngoLwesibili ntambama, unobhala weBBA uFrancis Dube uthe ukwanda kwamaqembu afuna ukuncintisa kuligi yabo kuyisitshengiselo sokuba umdlalo uyakhula.
“Silokuthaba ukubona ukuba banengi abadlali abafuna ukudlala kunkundla zethu. Eminyakeni edluleyo bekunganje, besicabanga ukuthi umdlalo usutshabalala ikanti usasekhona. Asemanengi amaqembu kuBulawayo Basketball Association,” kutsho uDube.
UDube uthe kuhlandla labesilisa, kuzakuba lamaligi amathathu, kwabesifazane kuzakuba lamaligi amabili.
“Kumdlalo wabesilisa sizakuba lamaligi amathathu, u-A, B loC. Kwabesifazane azabe emabili. Yikho okutshengisa ukukhula komdlalo koBulawayo.”
Amaqembu amatsha la abalisa iMidlanda State University, Gwanda Rebels, Golden State, Bulawayo City Towers, Ostrich, Catch Them Young le-Christian Brothers College.
Kumhlangano wamalunga lo, kuvunyelwane ukuba phambili kokuthi kuvulwe isizini entsha, kumele kuqhutshwe umncintiswano wamaqembu wonke mhlaka 23 Mpandula enkundleni yeKhanyisile.
UDube uthe okunye okuphume kumqoka emhlanganweni wabo kube yisivumelwano sokukhankasela ukuqhela komhlobo we-basketball okuthiwa yi- 3×3.
Kunhlelo zayo zokukhulisa umdlalo, iBBA ihlezi ibika ukuba ifuna ukufinyelela abadlali abalethalenta ku-basketball abadlala besezikolo ezisemalokitshini.
Kusenjalo, kumaqembu amakhulu kuligi yakoBulawayo, umncintiswano ukhangelelwe ukuthi uvuthwe njalo phakathi kwamaqembu abalisa i-Mavericks, Giants le-Lakers.
