uMthunywa
Innocent Kurira
BAJABULILE abomdlalo wokugijima kuleli kulandela ukuzwa ukuthi umjaho wePPC Matopos 33-Miler uzakuba khona lonyaka.
Umjaho lo bawucina kungakaqhamuki umkhuhlane we-Covid-19. Umgcinisihlalo weBulawayo Athletics Board (Bab) uWatson Madanyika utshele intatheli yeZimpapers Sports Hub kuliviki ukuthi sebeqalile ukulungiselela ukuqhutshwa kwalumncintiswano ongamakhilomitha angu-53, mhlaka 6 Mabasa.
Umjaho lo usukela eMatopo National Park.
“Siyajabula ukuthi umjaho wePPC 33-Miler usukhona kukhalenda yethu. Njengenhlanganiso ephethe umdlalo lo koBulawayo, sesivele sabeka konke okumele sikwenze kumalungiselelo, ukuze kube lempumelo enhle.
“Kumele sikhumbule ukuthi umjaho lo udonsa inengi labagijimi abavela endaweni ezinengi kuleli.Ngakho-ke, ngezinga lomjaho lo, kasifuni lutho olungasiphazamisa kumalungiselelo. Silethemba njalo ukuthi ngokuphenduka kwePPC, leminye imijaho izaqhutshwa,” nguMadanyika lo.
Umjaho lo wawunxusa abantu abedlula i-3 000 ngesikhathi usatshisa. Umncintiswano lo ulemijaho emithathu ebalisa i55km, i10km le5km.
Ngomnyaka ka-2019 kwanqoba u-Andrew Chimbidzikai owatshaya intambo ngamahola amathathu lemizuzu elitshumi lambili. UNkosiyazi Sibanda, ogijimela iBlanket Mine waba ngowesibili ngemva kwamahola amathathu lemizuzwana elitshumi lantathu.
UPeter Tumbare (Air Force) waba ngowesithathu. Kuhlanga labesifazane kwanqoba uChiedza Chokore (3.57.17) kwalandela uMuchaneta Gwata (4.22.53). Owesithathu kwaba nguMonica Kativhu (4.24.06).
