uMthunywa
YiNtatheli kaMthunywa
INGUQU yobungane koBulawayo izathola usekelo olungcono kulisizini ngokuphenduka kwenkezo yeRemest Car Sales eqala umncintiswayo wayo ngeviki ezayo.
Amathimu ayedlula angamatshumi amabili akumaligi angaphansi kweBulawayo Amateur Football Association le Bulawayo Social Soccer League azaphatheka kulumncintiswano.
Inkezo le izaqhutshwa kuze kuyedlalwa i-final ngoMfumfu.
Lonyaka kuzakhethwa amathimu ayisitshiya galombili kuligi yeBafa, kuphindwe kukhethwe ezedlula itshumi kuBulawayo Social League.
Loba abasekeli balinkezo bengakhululekanga ukuveza umvuzo, baqonqoselwe ukuthi lonyaka kuzakubangcono kuleminyaka edluleyo.
UJethro Moyo umaqhuzu weRemest Car Sales uthe inhloso yokusekela inguqu yobungane ivela ekuthini inkampani yakhe itshisekela ukuncedisa kwezemidlalo.
“Nxa sikhangelisisa, inguqu yobungane ayilangitsho usekelo. Amathimu athwele nzima ukuthi enelise ukugcwalisisa imidlalo yawo ngenxa yendleko ezikhona kunguqu.
“Inkampani yethu yeRemest Car Sales ifuna ukunceda umphakathi ngokuphakamisa abadlali lamathimu enguqu yobungane.”
“Nxa amathimu akunguqu yobungane koBulawayo etshengisela uthando lwenguqu ngalindlela, thina njengebhizimusi sibalomlandu wokuthi siwasekele.
“Inguqu yobungane ikhuthaza abadlali ukuthi banakekele impilo zabo lokuthi banikeze umzekeliso kwabasakhulayo,” kuphetha uMoyo.
