uMthunywa
Nkosilathi Sibanda
INENGI labalandeli benguqu elakhula ngesikhathi iHighlanders isatshisa, inqoba amaqembu wonke ayekhona, ingakuzwisisa nxa kuthiwa leliqembu yi-“cremora”.
Ngalezo zikhathi iHighlanders yayibizwa ngokunjalo ngoba iphezulu kwengalane yeCastle Lager Premiership. Sekusenzakala futhi kulisizini, osekubafake idlabuzane lethemba lokuthi ihlale iphezulu ize iyethwala inkezo.
Kuphenduke injabulo emulini yeqembu leli esibone ukukhanya ngokuza komqeqetshi uBaltemar Brito, osephenduke waba liqhawe koBulawayo.
Ukuza kwalumqeqetshi kudale inguquko enkulu lakundlela abadlali abalichaya ngalo ibhola. Uyakutsho laye umqeqetshi ukuthi iqembu lakhe alikafinyeleli la okumele libekhona, loba likhokhela ingalane.
Ngemva kwemidlalo eyisithupha, abafana bakaBrito bathe khoxo, kunombolo yakuqala bephethe imiklomelo elitshumi lanye. Kayikadliwa.
Ngemva kokucubungula ikhasi likaTwitter, lokuxoxisana labalandeli labathandi benguqu abatshiyeneyo, kuvele ukuthi uBrito usethole inhlonipho, lokuba iqembu leBosso ligcwele ukuzethemba.
uBaltermar Brito
Kubikwa lequla lenkokheli zeqembu, ezikhokhelwa nguJohnfat Sibanda ziyasuthiseka ngokusebenza loBrito. UMgcinisihlalo uKenneth Mhlophe uthe benza kuhle ngokukhietha uDe Jongh.
“Siyaphapha, siyandiza. Yithi iBosso. Lo nguye umqeqetshi ofanele iqembu lethu,” kutsho uMoses Malupo Ngwenya kuTwitter.
UMercy MaVundla, uphendule laye kuTwitter wathi:
“Lokhe efikileyo, umqeqetshi usefundise abadlali inhlonipho. Uyayitshaya into yakhe. Uxoxa lathi abasekeli kalula.
Ngeke usole lutho ngaye. Sithi kaqhubeke ngokwenza kuhle ngoba sekuletha injabulo eqenjini.UBrito uvale umnyama obuphezulu kweHighlanders owokudliwa mahlayana langamaqembu amancinyane.”
UKhonzani Sibutha osekela iBosso esePlumtree uthe loba bejabula ngomqeqetshi, bafuna ukuthi alungisise abanye abadlali abalakho ukumlahlisa phakathi kwesizini.
“Kulabadlali esingeke sibaqambe okumele batshintshe ukwenza.”
Kusenjalo, iHighlanders ingena umango iqonde eGweru, lapho ezadibana khona leqembu leSheasham enkundleni yeBata Stadium ngeSonto.
Imidlalo kulimpelaviki:
NgoLwesihlanu: Simba Bhora v Cranborne Bullets (National Sports Stadium)
NgoMgqibelo: Greenfuel v ZPC Kariba (Gibbo), FC Platinum v Manica Diamonds (Mandava), Chicken Inn v Herentals (Luveve), Yadah v Caps United (National Sports Stadium)
NgeSonto: Sheasham v Highlanders (Bata Stadium), Dynamos v Triangle United (National Sports Stadium), Hwange v Bulawayo Chiefs (Colliery)
NgoLwesithathu 10 Nkwenkwezi: Black Rhinos v Ngezi Platinum Stars (National Sports Stadium)
