‘WONKE UMDLALI ULEPHUPHO’

29 Apr, 2021 - 00:04 0 Views
‘WONKE UMDLALI ULEPHUPHO’

uMthunywa

Nkosilathi Sibanda
ABAPHATHI bomdlali wenguqu uPrince Dube babika ukuthi bafuna ukuthi ayelikhaba kuloba yiliphi iqembu kwele-Europe.

Lokhu kuza ngesikhathi umdlali lo esedabule umambule ngendlela esimangalise ababukeli labathandi bemidlalo yeligi yaseTanzania lapho adlala khona.

UDube, obedlalela iHighlanders kumasizini adluleyo, usehlohlela iqembu le-Azam. Kubikwa abaphathi bakhe bakuleli iqembu sebekubona ukuthi uDube akumelanga aphelele eTanzania.

Umdlali lo usehlohle amabhola angu-12, loba wahlala phansi amaviki ayisithupha elimele.

Udletshana oselugcwele kunkundla zenguqu luveza ukuthi umnyaka lo awupheli uPrince engazange alugxobe kwele-Europe.

Ekhuluma ese-Tanzania lentatheli yephephandaba likazulu ngoLwesibili, uPrince wazise ukuba ufuna ukuqeda isizini kunguye ophambili ngamabhola.

“Lami ngiyafuna ukuthi ngibe ngumdlali ozaphakamisa iqembu lami le-Azam. Wonke umdlali ulephupho, lami ngilephupho elikhulu,” kutsho lumdlali.

Umdlali lo ufike eqenjini le-Azam wathandwa ukwedlula bonke abadlali ngenxa yokuhlohla kwakhe mihla ngemihla.

Umgadli lo kuthe elenyanga ezimbili eseTanzania, waphathwa emlonyeni yabalandeli lababukeli bebhola leligi ephakemeyo kulelo eye-Vodacom Premier League.

Ngaphandle kokuhlohla, uPrince uncedisa kakhulu ukunikeza abanye abadlali ibhola ukuthi balithele emambuleni.

Uthe ngokufika kwakhe ewathela emambuleni, uPrince unikezwe ibizo elithi “The Beast”.

Umdlali lo, loba ekhokhela ngamabhola, bakhona abamhlezi izithende okutshengisa ukuthi ibhola leTanzania lonyaka lizakhipha umncintiswano wengcitshi zokuhlohla.

 

Share This:

Sponsored Links