uMthunywa
Nkosilathi Sibanda
KULANDELA ukuthola kwakhe imendulo ezine emncintiswaneni wokugijima, umfundi wesikolo seNkosikazi Primary, uNolwazi Mpunzi usezabhadalelwa indleko zesikolo ngenye inkampani yakoBulawayo, iSports Zone.
UNolwazi, oleminyaka elitshumi yokuzalwa, okuGrade 4, wenza kuhle kumincintiswano yeNational Association of Primary School Heads (Naph) eNkayi kumaviki amabili adluleyo. Inkampani yeSports Zone ibike ukuba izabhadala i-school fees sikaMpunzi aze afike kuGrade 7.
Isikolo sakhe singaphansi kwesigaba seBubi, eMatabeleland North. Wathola igolide kumbango we-100 metres, 200m, 400m le-long jump.
UNolwazi ubuye njalo wathola imendulo yethusi (bronze) kumbango we-200m, kumncintiswano wezabelo enkundleni zeKyle College ngeviki edluleyo.
Umqondisi weSports Zone uSibusisiwe Bingadadi utshele iZimpapers Sports Hub ukuthi bakubone kufanele ukuthi baphathise kuzifundo zikaNolwazi.
Uthe uNolwazi lamanye amankazana akubanga lakhe ahlala emaphandleni, alethalenta kwezemidlalo, kumele baphathiswe ukuze bakhule bekwazi ukusebenzisa amathalenta la, benelise lokuguqula impilo zabo kwelingcono.
“Sithintekile ngendlela uNolwazi adlale ngayo njengoba ethole imendulo ezine zegolide ku-final yesabelo seMatabeleland North. Ukwenza kahle okufana lalokhu kufanele kusekelwe. Ngakho-ke, njengenkampani elobudlelwano obuhle lezikolo, sabona kufanele senze okuthile kuNolwazi.
“Sizasifeza isithembiso sethu sokubhadala imali yesikolo aze aqede imfundo yakhe yebanga laphansi. Sifuna uNolwazi afeze amaphupho lakhe asebenzise ithalenta lakhe. Sifuna akwazi njalo ukuthi abale ingwalo zakhe, aphinde enze kakuhle lakwezemidlalo,” kutsho uBingadadi.
Umqeqetshi kaMpunzi, uBianca Mbedzi uthe isenzo seSports Zone sizaphathisa kakhulu.
“Siyabonga kakhulu kuSports Zone ngalokhu ehlose ukukwenza.”
Ngokuthola imendulo ezine, uNolwazi uphinde waba lenhlanhla yokuphiwa imali ngosomabhizinisi beNkayi.
Omunye wabosomabhizimusi laba ngu-Arthur Moyo, odume kwezamabhizimusi okwakha lamahotela kulindawo.
UMoyo uthe: “Wenze kahle, wasenza saziqhenya njengeMatabeleland North. Angeke sihlale singanaki umgijimi olethalenta elingaka. Njengabamabhizinisi esabelweni sethu, kumele siqhubeke ngokusekela abantwabethu ezikolo.”
