uMthunywa
Mthokozisi Dube
U-JOEY Antipas ubika ukuthi wenza umsebenzi wakhe waqeda kuChicken Inn, ngakho umqeqetshi omutsha uRahman Gumbo ufice ithimu le isilolongwe yaphelela.
Iphephandaba likazulu lixhumane loAntipas phakathi kwaliviki wabika ukuthi ubona angathi uGumbo uthole inkundla isiyendlaliwe ngobukhali babadlali azasebenza labo kuChicken Inn.
UAntipas ubike njalo ukuthi nguye owakhetha ukuthi kungene uGumbo endaweni yakhe.
“Uzafica abadlali abatshukwe kwazwela sibili. IChicken Inn asiqembu lokudelela ngoba abadlali bonke bazimisele ukunqoba kuyo yonke imidlalo. Ngiyazi ukuthi uRahman (Gumbo) ufice ithimu ephekiweyo,” kutsho uAntipas.
AmaGamecocks aqhatshe uGumbo ngoba uAntipas esesiya kuAmaZulu yaseSouth Africa. UGumbo nguye lo owaqeqetsha, wakhuza iBosso yahluthuna inkezo yeligi ngesizini ka1999 kusiya ku2000.
Kukhanya iChicken Inn ilesifiso sokuthi umqeqetshi lo athathele lapho okutshiye khona uAntipas, aqhubeke ngokuyithwala iligi yeCastle kulisizini.
UGumbo ubangumqeqetshi wesihlanu ukukhuza iChicken Inn kulandela ukungena kwayo kuligi ephezulu.
IChicken Inn yangena kuligi. Umqeqetshi lo uthole lumsebenzi kulandela inkuthazo kaAntipas ukuba iqembu leli lithathe yena nxa lifuna ukulwela ukuba zintshantshu zakuleli.
Ekhuluma lephephandaba likazulu emahofisini eChicken Inn, umabhalane wethimu uTavengwa Hara ubike ukuba bakhethe uRush kulandela udumo alalo ngokukhuza amaqembu akuleli lakwamanye amazwe.
“Sasisazi ukuthi kuyeza lokhu ngoba laye uAntipas kumele akhule phela njengomqeqetshi ngokukhuza amaqembu akuligi ephezulu. Kungakho sesikhethe uGumbo ngoba asifuni mqeqetshi ozafika ethi ngisazama ukwakha ithimu ngoba silwela ukuthi amaqembu asihloniphe njengentshantshu,” kuveza uHara.
UHara ugcizelele ukuthi asimqeqetshi omutsha kubalandeli benguqu njengoba sewaqeqetsha amaqembu kuligi yakuleli lakwamanye amazwe kungakho bayakholwa ukuba ulolwazi ngesimo somdlalo wakuleli.
“Sifuna kubelokutshintshana kwabaqeqetshi okuhle kungakho uAntipas uzaba laye uGumbo emidlalweni esizayidlala ngoba sasingeke sithi sizamelela uAntipas atshiye umsebenzi njalo akulasinqumo esithi lumqeqetshi uzatshiya umsebenzi mhlaka 1 kuNhlangula kodwa uzabe esevele esekhuza khonale eGoli,” kubika uHara.
UGumbo ukhangelelwe ukuba sebhentshini lamaGamecocks emdlalweni walo le Triangle ngoLwesihlanu enkundleni yeLuveve.
UHara ubike njalo ukuthi abaqeqetshi laba bake basebenza bonke kuqembu leMotor Action uAntipas engumsekeli kaRahman. UGumbo ubike ukuba ukungena kwakhe kuqembu lamaGamecocks kumethesa umlandu omkhulu kulandela ukuthi leliqembu lisakhula njalo kumupha lethuba lokuthi abe seduzane lemuli yakhe.
“Ngizizwa ngilomlandu omkhulu ngoba iligi yakuleli kunengi okuselekusenzakala ngesikhathi ngingekho kodwa ngifuna ukwenza ngcono kulalokho engakwenza eminyakeni engu 15 eyedlulayo,” kubika uRush ngokuzithemba okukhulu.
URahman ubike ngokunganaki ukuthi ungomunye wabaqeqetshi abakhulu kuleli kungakho uzizwa ethabile ngokuphenduka kontuthu.
