uMthunywa
SIYAHLANGANA bafundi ngeviki yesibili yokuvulwa kwezikolo, ngithemba liqhuba kuhle ezifundweni zenu.
Kulabo abazaqalisa ukubhala imihloliso yabo kuviki ezayo yokuphela komnyaka oGrade 7, ngilifisela inhlanhla.
Nanzi impendulo zomsebenzi wokuhlonipha engalipha wona kuviki ephelileyo
1. yikukhothana
2. wedlule, kasekho
3. yikuzithwala, yikuthatha isisu, yikuma kubi
4. ubelethile kumbe ukhululekile
5. udle amabele (b) ubeqhuba imbuzi, ubethinta imbuzi.
6. ukhiphe umoya
Kulezinsuku siyananzelela ukuthi ukudla okuthile okwesintu asisakwazi. Kubanzima lokwehlukanisa okunye okuhambelanayo.
Inguquko esikhona kunhlalo yabantu yiyo esilethe ukusilela kolwazi lolu. Akesikhangele okunye ukudla kwesintu esikubuzwayo lasemhlolisweni wolimi, lapho kudingeka ingcazelo yakho kumbe ukutsho ukuthi kubonakala ngani.
Isibonelo: Kuyini okuphekwa ngochago lwenkomo esanda ukuzala. Uchago lolu luthelwa embizeni lugoqozwe kuze kujiye kuphose kufane lamasi angahlangananga, kucengwe umlaza kudliwe njalo adliwa ngabafana kuphela: Amahlaka
Lapha ke:
(i) Amanzi abakhona ngaphansi kochago oluvuthiswayo ……….
(ii) Uchago oluvuthisiweyo lwenkomo okukudala yazala okungatshetshwa ngalo isitshwala ………………..
(ii) Uhayezi oluphothuliweyo, luvutshwa ngamasi
kuthiwe ngamasi omcaba …….
(iii) Uchago oluvuthiweyo kodwa olungakajiyi kakhulu ukuthi luthiwe ngamasi ………..
(iv) Amafutha abakhona eqhageni okugcotshwa ngawo loba okuphekwa ngawo ……………
Sizahlangana njalo ngeviki ezayo.
Bafundi thumelani impendulo zenu kunombolo lezi 0773675473 kumbe ku-0778520007 ngeWhatsApp loba ngeSms. Ufake ibizo lesibongo sakho, ukuthi ukuliphi ibanga lokuthi ufunda kusiphi isikolo. Thumela njalo lomfanekiso wakho. Kuphephandaba lakuviki ezayo sizafaka impendulo kanye lezithombe zenu.
