uMthunywa
Brandon Moyo
KUMALANGA ambalwa alandelayo, isizini yomdlalo we-golf yomnyaka ka-2024 eZimbabwe iyaqala ngomqhudelwano weDugmore and Fellowship ozadlalwa seBulawayo Golf Club.
Umqhudelwano lo uzaqhutshwa ngempelaviki ka-mhlaka 27 lo-28 Zibandlela njalo ukhangelelwe ukukhanga bonke abadlali abasakhulayo elizweni.
Ngemuva kweDugmore Challenge, okungumqhudelwano odibanisa bonke abadlali abasakhulayo abesilisa labesifazane, umqhudelwano olandelayo ekhalendeni yalumdlalo uzadlalelwa eSouth Africa.
Umqhudelwano lo kuthiwa yiSouth African Swing Tournament ozabe useMount Edgecomb, Royal Johannesburg, Modderfoinatin laseHoughton.
Kuzaphinda kube lomunye umqhudelwano wezizwe ze-Africa ozadlalwa ngoNhlolanja. Umongameli weZimbabwe Golf Association (ZGA) uMartin Chikwana utshele iZimpapers Sports Hub ukuthi yonke imiqhudelwano ezadlalwa lonyaka ibhaliswe leWorld Amateur Golf Ranking (WAGR), ngakho izabe iqakathekile kubo bonke abadlali ukuze bethole imiklomelo.
“Yonke imiqhudelwano yethu ibhaliswe le-WAGR ngakho-ke kuqakathekile ukuthi abadlali benze kuhle ukuze bathole imiklomelo emihle ezabancedisa ukuba sezingeni elingcono emhlabeni. Kuzabakhona i-Africa Amateur Championship, umqhudelwano wezizwe zonke zeAfrica. Abaphumelelayo bazadlala kuBritish Open.
“Sithemba ukuthi umnyaka lo uzakuba ngomunye umnyaka obalulekileyo kithi. Sikhangelele ukudlala kumiqhudelwano eminengi yeAfrica njalo lo ngumnyaka wama-Olympics, sikhangelele ukuthi omunye wabadlali bethu aphumelele ukuyadlala kundebe yomhlaba, baphakamise ilizwe lethu,” kutsho uChikwana.
IZGA ihlela njalo ukuhambisa i-golf kuzindawo zonke elizweni ukuze wonke umuntu enelise ukuyidlala lokuba lolwazi kulumdlalo.
Inhlanganiso yeZGA ikhangelele ukuthi abadlali bonke babhadale imali zamakilabhu abo ukuze kungabi lokuphambaniseka kwemidlalo.
