uMthunywa
YiNtatheli kaMthunywa
UTAPUWA Kapini owake wabangunozinti weqembu leHighlanders kungenzeka aphenduke kwezikamagebhula lonyaka.
Loba esemdala, uKapini ulokhe ethandwa ngabalandeli beBosso lalabo abasekela ithimu yesizwe amaWarriors lapho avimba igedi kwajabula abanengi.
Ukuza kukaKapini akukagcwaliseki kodwa abafakazi abaqotho babikele uMthunywa ukuthi “uCampos” engaphenduka ekhaya nxa iqembu lakhe leHighlands Park lingehluleka ukungena kuligi ephakemeyo eyeAbsa kweleSouth Africa.
Okwamanje iHighlands Park eku-Division One ilwela isikhala sokuthi ingene kuligi ephakemeyo ngendlela yama-play off. Ithimu kaKapini le isinqobe kumdlalo wayo wakuqala kuma-play off la.
“UKapini engaphenduka ekhaya njalo inye ithimu angafuna ukuyidlalela, iHighlanders, akula enye. Inhloso yakhe yikuthi adlale kuqembu elikuPremiership.
“Nxa ithimu yakhe yeHighlands Park ingehluleka ukungena kuAbsa, mhlawumbe engaphenduka,” kutsho umdlali oseduzane loKapini ekhuluma kuliviki.
Ukuza kwakhe kuTshilamoya kungaphathisa ithimu le okukhanya ixegisa kubonozinti nanko okwamanje ithembele kuArial Sibanda loNjabulo Nyoni.
Lomqeqetshi wabonozinti uCosmas “Tsano” Zulu usekhulume kanengi ukuthi kumele baqinise ibhentshi leli.
Imizamo yokukhuluma loKapini yehlule kodwa unozinti lo uphume ebulenjini be-Kickoff.com esithi udaba lokuphenduka kwakhe eZimbabwe lungamahungahunga ngoba owakhe umsebenzi usasekuHighlands Park.
“Kumele sinqobe umdlalo wethu leqembu leMbombela ukuze sibone ukuthi siyafinyelela kuPSL.”
Unozinti lo kulisizini usevimbe okwengcino ngoba behluleka ukumhlohla ka-17 emdlalweni engu-29.
Umdlali lo usuke kuBosso ngesizini ka2006, umnyaka lapho ithimu le eyacina ukuthwala inkezo yeligi. Usedlalele amathimu aseSouth Africa abalisa iAmaZulu lePlatinum Stars.