uMthunywa
Nkosilathi Sibanda
BAQAKEZE bengaqedi ababukeli bomdlalo obuphakathi kweHighlanders leDynamos ngobugcitshi bomdlali uCleopas Kapupurika bencoma ubuhle bomdlalo wakhe.
Kulandela ukukhuhla ibhentshi okwesikhathi eside, lumdlali utshengise umqeqetshi uMadinda Ndlovu ukuthi ubephethe eyekethisa ithalenta ligcwala irusi.
Ungene okwakuqala enkundleni kumdlalo weCastle Lager wetshumi lapho iBosso idlala leHerentals ekhaya, wathi elithinta ibhola ababukeli bazibuza bengatholi impendulo yokuthi ubehlaliselweni ebhentshini sonke isikhathi.
Lomqeqetshi engabe wasala elenhloni ngoba nangu umdlali ofike wantshintsha umdlalo weBosso ngemva kukuba leliqembu lidonse amaviki linganqobi
UKapupurika ubeyingqwele ehlohla ibhola elilodwa iBosso isidla isitha esidala iDynamos eMagumeni ngeSonto.
Ukuhlohla kwakhe kuze kulandela ukudla kwamehlo akuphakulele uzulu obethe gwaqa, kugcwele phamu esamendeni senkundla.
Kubikwa bekulabantu abangu-16 543 abazibonele ithalenta eliphethwe ngumdlali omutsha kuBosso, esenza umathanda kwaqakeza labe-Dynamos ndawonye.
Okujabulise abasekeli beTshilamoya yikuthi uKapupurika udlale ngenhliziyo ehlasela iqembu ayekulo ngesizini edluleyo.
IDynamos yacina ukudla iBosso ngo-2016.
Okwesibili kulisizini lumdlali ukhulise ibizo lomqeqetshi ngesikhathi enconywa ngabalandeli ngokwehluleka ukubumba iqembu elinqobayo.
Ubuhle bomdlalo wangeSonto bugcwaliseka ngokubuka loRyan ‘‘Ndori Ndori’’ Lunga ongomunye wabadlali abatshayelwe ihlombe.
ULunga uphinde wabareyitsha ezama ukuhlohlela phakathi ibhola kwaze kwadinwa zona imvimbi ezithenjiweyo kuDynamos.
Lumdlali wanceda umsebenzi kamqeqetshi uMadinda Ndlovu sekukhangelelwe ukuthi axotshwe ngokuhlohla kumdlalo wakuqala iHighlanders inqoba eBarbourfields.
Kumdlalo leDynamos, uLunga ulikhabe kanye eliqondise emambuleni, kwasiza unozinti wezethekeli uSimba Chinani.
UNdlovu wakubika engafihli lutho ngokukhonza umdlalo kaLunga esithi iHighlanders ilomahlakanipheni womdali.
“URyan ngumdlali ohlakaniphe kakhulu. Umdlalo wakhe uyangijabulisa,” nguMadinda lo ebabaza umdlali.
