uMthunywa
Nkosilathi Sibanda
UMDLALI weqembu leHighlanders u-Andrew Mbeba wenze kuhle kulisizini nanko phela uzaphakanyiswa njengengxenye yabadlali abazingcitshi abazavezwa ngoLwesihlanu ntambama.
Lokhu kuza ngemva kokukhethwa kwabadlali abalitshumi lanye abazangena kukhalenda yengcitshi kuligi yeCastle Lager yalonyaka. Abadlali laba bakhethwe liqula lentatheli zemidlalo, abaqeqetshi labokaputeni bamaqembu wonke adlale kuligi ephakemeyo.
UMbeba, odlala eyimvimbi, usekhethwe okwesibili, okuyikho okuveza ukuthi uyidlale kuhle indima, wenelisa ukusebenza labanye abadlali ukuvimba igedi leBosso.
Utshele intatheli yeZimpapers Sports Hub ukuthi umanzi te ngokuthaba, nanko phela laye uzizwa engumdlali kuzwa.
“Akulanto ehlabusa njengokubona ibizo lakho kuluhlu lwabadlali abakuma-soccer stars. Kufunwa ngumdlali wonke lokhu. Eqinisweni Ngiyabonga kubo bonke ababukela umdlalo wami, bavuma ukuthi ngempela ngenze kuhle,” kutsho lumdlalo ngoLwesibili emini, ngesikhathi sekusabalale amabizo abadlali abakhethiweyo.
Loba uMbeba ebonakale engodlale kuhle kulabanye, abalandeli lababukeli bemidlalo yeHighlanders bazavuma ukuthi ubengeke akwenze eyedwa.
Kuqula lemvimbi zeHighlanders kumele kubongwe njalo uMbongeni “Mbola” Ndlovu loPeter Muduhwa ngoba babeyinsika yokuvimbela iqembu.
Imvimbi lezi zitshayelwa izandla ngokusebenza kwazo, okwenza iBosso yaqeda imidlalo elitshumi lasitshiya galolunye inganqotshwa.
Ukudlala lokhu kuphinde kwaphakamisa lonozinti u-Ariel Sibanda, laye okhethwe kukhalenda yeCastle Lager yalonyaka.
KuHighlanders kukhethwe uMbeba loSibanda.
Unozinti lo, ophinda abengukaputeni usekhethwe kane kukhalenda njalo kungenzeka ancintise ukuba yingxenye yabathathu abadlala ukwedlula bonke.
Ukhulume ngokuzehlisa uSibanda ngokukhethwa kwakhe.
“Ngibonga bonke engidlala labo kuHighlanders. Ukukhethwa kwami yikukhethwa kwabo. Ngithanda ukudumisa uNkulunkulu, ngibonge abaqeqetshi bami lamalunga emuli yami ngokungiqinisa kusukela isizini iqala,” kutsho unozinti lo odume ngamabizo athi “Dawu” kumbe “Mangoye”.
Kusenjalo, ngoLwesihlanu kuzaqhutshwa umcimbi wokuthakazelela ukukhethwa kwabadlali.
Emcimbini lo kuzavulwa incwadi elamabizo abadlali abathathu abahambe phambili njengengcitshi.
Kwabathathu laba, oyedwa nguye ozaphiwa isicoco se-Soccer Star of the Year.
Kubadlali laba, iphephandaba likazulu likhangelele ukuthi kube lo-Obriel Chirinda oweChicken Inn, uNelson Chadys (Ngezi Platinum), Takunda Benhura (Manica Diamonds) kumbe uQadr Amin oweNgezi Platinum.
Isicoco sikamqeqetshi owedlule bonke ngesikaTakesure Chiragwi, umqeqetshi wentshantshu iNgezi Platinum Stars.
Lapha akuthandabuzwa ngoba nangu umqeqetshi oziqalisele indima yakhe kuhle, wayicenta, wayiqeda ngendlela elethe impumela enhle ekupheleni komkhankaso womdlalo. Kuzavezwa njalo lebizo lomdlali osakhulayo othembisa ukwenza kuhle kwelakusasa kusicoco seMost Promising Player.
Umdlali lo kumele abeleminyaka yokuzalwa engaphansi kwamatshumi amabili.
Amabizo abadlali abenze kuhle kuCastle Lager:
Ariel Sibanda (Highlanders) GK, Tinotenda Benza (Herentals), Donald Mudadi (Dynamos), Tanaka Shandirwa (Dynamos), Takunda Benhura (Ngezi Platinum), Nelson Chadya (Ngezi Platinum), Qadir Amin (Ngezi Platinum), Andrew Mbeba (Highlanders), Michael Charamba (Chicken Inn), Fortune Binzi (Manica Diamonds) Obriel Chirinda (Bulawayo Chiefs)
