uMthunywa
YiNtatheli kaMthunywa
IQEMBU leHwange likhangele umnyango wokuphindela ezikwakweni zika-Division One yikho selixotshe umqeqetshi uNation Dube.
Utshengiswe indlela eqonda ekhaya uDube ngokunqotshwa kweChipangano sengathi ayazi ekwenzayo kunguqu kumidlalo edlula itshumi edluleyo. UDube ususwa emsebenzini kanje iqembu lisanda ukwehlukana lomsekeli wakhe uBrian Njobvu.
Akwethusanga kodwa kudale insolo kubalandeli ukuthi kungani uDube exotshwa ngalesi isikhathi endaweni yokuthi ngabe kwadingwa umqeqetshi owayezasiza ukuthi iHwange iphumelele.
Isikhulumi esingumfakazi wodaba sithe uNation uxotshwe yikomithi ekhokhelwa nguButholezwe Dube ngeSonto ntambama ngemva kokunqotshwa yiHerentals nge 3-2 egumeni leColliery.
“Bamxotshile uNation ngoba wehluleke ukusiza iqembu. Inkokheli zethu azifuni ukutsho lokhu okwamanje kodwa iqiniso yikuthi kuliviki asimboni elolonga abadlali.”
Kubikwa ikomithi yeHwange iphakamise uEdmore “MaMkhwebu” Sibanda ukuthi abengumqeqetshi.
Kumidlalo elitshumi yokuvula iligi uNation wedlula bonke abaqeqetshi wathola isicoco.
UDube wakhuza iqembu leli lisuka ezikwakweni zika-Division One lapho atshiye ebuthelele imiklomelo yonke.
Ngesinye isikhathi kulisizini iChipangano itshikilisana leChicken Inn phezulu kwelogu. Okwenza iHwange yabonakala yikuthi ayivela ku-
Division One njalo kungela abalandeli bomdlalo abayinikeze ithuba lokudlala kuhle.
Osaziwayo kwezokuhlaziywa kwenguqu bavumelana ukuthi iHwange liqembu lizadonsa amehlo, ikanti batshaya iganga.
U-Gideon “Supa Dupa” Siwela ohlaziya ibhola lenyawo uthe kubo bonke abaqeqetshi, uDube waqala etshengisa ukuba uyazi akuqophileyo kuPSL.
“Samtshayela izandla uNation Dube kumidlalo yakhe yokuvula isizini. Kusuke kwabanzima sibili kuhlandla lesibili lesizini.”
Uqhubeke wathi umqeqetshi lo kusegcekeni ukuthi ukhaliphile kwezenguqu kodwa kuzamele adinge elinye iqembu ngaphandle kwedolobho leHwange.
UMthunywa ukhulume loGerald Zulu, umgadli weHwange obike ukuba akulamqeqetshi ofana loDube.
“Ulolwazi lomdlalo engibona angathi akula omunye umqeqetshi ongamedlula.”
