uMthunywa
UVUKELE abezindaba ngolaka umqeqetshi weFrance, uDidier Deschamps, ngemva komdlalo wokuvula imidlalo ka-Group D kunkezo yoMhlaba lapho ababhaxabule khona i-Australia nge4-1 e-Al Janoub Stadium, eQatar.
Endaweni yokuthi azitshaye isifuba ngokuqala ngonyawo oluhle emqhudelwaneni okuyibona abawuvikelayo, uDeschamps utshengise ukunengeka ngesikhathi ebuzwa ngo-Oliver Giroud, ohlohle amabhola amabili.
Amanye amabhola eFrance atshaywe ngu-Adrien Rabiot, elokuqala loKillian Mbappe, otshaye elokucina.
UGiroud odlala ku-AC Milan, e-Italy, uhlohle amabhola amabili nanko uselingana lenkakha yeFrance, uThiery Henry, ngokuhlohlela leli qembu lesizwe. Akazange awuqede umdlalo uGiroud okudale ukuthi abezindaba babuze kuDeschamps ukuthi kungani emkhiphile ngoba lokhu kumphuce ithuba lokudlula uHenry?
“Kungani lingibuze lokhu elingibuza khona, kumbe lifuna kube yini abaqeqetshi beFrance? UGiroud ngimdingela ukuhlohla amabhola ngakho-ke ebesekwenzile lokhu engimdingela khona. Kunengi okufanele ukucabange uma ungumqeqetshi,” kutsho uDeschamps.
“Ezinsukwini ezine sizabe sidlala leDenmark. Silethuba lokukhangela izinto ezinengi ngoba sibelenhlanhla yokutshaya amabhola amane emdlalweni wokuqala.
“Kubalulekile ukumphumuza umdlali ofana oGiroud kodwa futhi kumqoka ngendlela efanayo lokunika ithuba abadlali abangazange bawuqale umdlalo,” kutsho lu mqeqetshi owathwala isicoco somhlaba esengukaputeni weFrance ngo-1998.
UGiroud (36) akacinanga ngokufica uHenry ngamabhola kodwa ube ngumdlali wesibili omdala kulabo bonke ukuhlohla amabhola amabili emdlalweni owodwa wenkezo yoMhlaba.
Ulandela inkakha yeCameroon, uRoger Milla eyakwenza lokhu ngo-1990 eleminyaka engu-38.
