uMthunywa
Nkosilathi Sibanda
“SESIDINIWE ngabadlali abaphenduka ethimini baphinde basibalekele. Vele ikhuba lokweboleka alilandima,” Lokhu kutshiwo zinkokheli zeHighlanders kulandela ukufulathelwa ngumdlali uValentine Ndaba esiyakusitha esikhulu iDynamos.
Kubikwa uNdaba ukhuthazwe ngumalumakhe ukuthi asuke kuHighlanders njengoba ikhontileka (contract) yalumdlali leBosso ibisiphelile.
Umalume lo, okungasatholakalanga ibizo lakhe, kubikwa ulilunga labalandeli beDeMbare.
IHighlanders ibika ukuthi ayisoze izihluphe ngokuncenga abadlali abafuna ukuphuma kulithimu kulisizini ngoba ilabo abavele belindele ukuthi ibaphakamise.
NgoLwesibili, uNdaba usayine isivumelwano sokudlalela iqembu leDynamos, lapho okubikwa uqale ukugijima khona kuliviki. UMthunywa uthintane lomdlali lo obike ukuthi kuliqiniso ukuthi usetshiye iBosso.
“Sengisukile kuHighlanders. Ngizadlalela iDynamos kulisizini. Okwenze ngasuka yikuthi iHighlanders ibingafuni ukuchaza ukuthi izangigcina na lonyaka. Abadala beDynamos bakhuluma lami kudala, ngakho bekungela enye ithimu,” kutsho lumdlali.
UNdumiso Gumede umaqhuzu weBosso uthe bazama ukuthi bakhulumisane loNdaba kodwa kwangani batshaya idwala.
“Kwehlula. ukuthi sivumelane. Umfana wayephethe esithi umalumakhe kafuni aphenduke kuBosso. Sabatshela abadlali bethu ukuthi sibafuna bonke kulisizini. Asazi ukuthi uValentine wasolani njengoba ubesedlala kuhle isizini edluleyo isisiyaphela.
“Banengi asebefuna ukulandela uObadiah Tarumbwa. Kufana lokuthi sichitha isikhathi labadlali abangayisibo, abalande ukuzodiliza iqembu.”
UGumede wengezelele wathi ababalekela iHighlanders bazadibana layo kuphela.
“Bazakuya ngaphi? Babethi ayibulawe, ayisoze ibulawe. Lapha abayakhona bazahlangana leHighlanders eqine saka.”
Kusenjalo, iphephandaba likazulu livakatshele enkundleni lapho okulolonga khona iHighlanders. Kutholakale ukuthi banengi abadlali abalesifiso sokutshibilikela uMantengwane.
UGumede uthe basamelele ukuthi kulungisiswe amaphepha omqeqetshi omutsha uErol Akbay, andubana bakhulume ngenani labadlali abazathengwa liqembu.
