uMthunywa
Innocent Kurira
UMDLALI wenguqu oselesikhathi eside eligiqa, uNewman Sianchali lomdlali wasesiswini uWellington Kamudyariwa kubikwa balakho ukuthi bathengwe liqembu le-Adachi, elikuligi yeZifa Division One kumhlubulo ongezansi yelizwe.
Umqeqetshi we-Adachi uJohannes Ngodzo uthe likhona ithuba lokuthi laba bobabili bangene enhlelweni zakhe kulisizini.
“Akukho okubambekayo okwakhathesi. Sisabahlola abadlali bobabili. Nxa singasuthiseka ngabo, sizabangenisa eqenjini. Inengi labadlali bethu ngabasakhulayo kodwa kuyadingeka ukuthi sithole lalabo abalesikhathi bedlala.
“Siyasuthiseka ngamalungiselelo ethu esizini ezayo njalo ngilethemba lokuthi sizaba lomkhankaso ozasinikeza impumela enhle,” kutsho uNgodzo ngesikhathi ekhuluma lentatheli yeZimpapers Sports Hub.
USianchali waziwa njengomdlali osedlule kumaqembu amanengi njalo useke wadlalela iHighlanders, Caps United leDynamos.
Amanye amaqembu adlule kuwo abalisa iBantu Rovers, Bulawayo City, ZPC Munyati leZPC Kariba.
UKamudyariwa wadlalela iChicken Inn le-FC Platinum.
UNgodzo usebize abadlali abakhulileyo abazakhela amabizo kudala uObadiah Tarumbwa loThabani Goredema.
UTarumbwa wadlalela iHighlanders, wafika eBelgium, Cyprus, Kenya laseSouth Africa. UGoredema watshibilikela iCaps United, Chicken Inn, Bulawayo City leHwange.
Kusenjalo, iqembu le-Adachi seliqhatshe uXolani Nkundlande osengumsekeli kaNgodzo.
UPhilani “Beefy” Ncube, owayengumqeqetshi ngesizini edluleyo unikezwe isikhundla sokuba ngumqondisi wenhlelo zokuqeqetsha eqenjini.
Iqembu leli lisekelwa ngemali ngu-Adrian Mtungwazi ohlala e-Australia.
Ngesizini edluleyo i-Adachi yayilabadlali ababalisa unozinti uNonjabulo Dube, Thandolwenkosi Ncube, Elton Ndlovu, Welcome Ndiweni, Innocent Kutsanzira loCrispen Machisi. Abanye abadlali ababekhona ngu-Ocient Ncube, Spar Dube loBothwell Nyathi.
