uMthunywa
UGIFT Lunga Junior loJohannes Ngodzo bamukele ngazo zonke izandla umlandu wokuthi baqeqetshe kuReal Betis Academy Zimbabwe.
Bobabili laba bazakhela udumo bedlalela iqembu leHighlanders kodwa okwamanje sebengabaqeqetshi kuzwa kumdlalo wenguqu.
Ukuqhatshwa kukaNgodzo loJunior kuyisibonelo sokuthi bagcwele abadlali abalethalenta kunguqu kulumhlubulo welizwe, ngokutsho kukamongameli weReal Betis Academy Zimbabwe uGerald Sibanda.
uGift Lunga Jnr
USibanda ubikele iphephandaba likazulu kuliviki ukuba bahlala phansi njengokolitshi lenguqu bavumelana ukuthi akula abanye abaqeqetshi abamqoka ukwedlula uNgodzo loJunior.
“Ngabadlali bephinde babengabaqeqetshi. Lokho yikho okwenza sakhetha bona ngoba sibona ukuthi ukusebenza labo kuzafeza iphupho lethu lokuthola abadlali abalethalenta,” kutsho uSibanda.
UNgodzo loJunior babizwe kuReal Betis Academy labaqeqetshi abasacathula kunobhutshuzwayo ababalisa uMurape Murape owadlalela iDynamos, uPhilemon Mutyakureva loTichaona Diya.
“UJohannes Ngodzo loGift Lunga bazenza uhlelo lwethu lubeyimpumelelo ezabelweni zeMatabeleland. Sifuna ukufukula ithalenta,” nguSibanda lo.
Ikolotshi leReal Betis Academy Zimbabwe lisungulwe kuleli ngenyanga kaMfumfu edolobheni leHarare.
UNgodzo owayereyitsha amadoda waze waphiwa elithi “Signature” uthe ukuba yingxenye yeReal Betis Academy Zimbabwe kuzanceda kakhulu ukuvulela abadlali bakoBulawayo amathuba.
“Ngiyakwamukela ukuba lilunga labaqeqetshi be real Betis Academy Zimbabwe. Leli lithuba kubadlali bethu abasakhulayo. Lakimi kuzaphakamisa izinga lobuqeqetshi bami,”
UJunior uthe inguqu yakuleli izaphakama uma kusungulwa inhlelo lamalokitshi womdlalo.
“Ngibona iAcademy le iyinsika yokuphakama kwenguqu yeZimbabwe,” kutsho lumqeqetshi owabizwa ngokuthi nguThebe.
