uMthunywa
YiNtatheli kaMthunywa
SEKULEMINYAKA embalwa uThamsanqa Dube engatholi umuntu wokulwa laye esitikini somdlalo we-boxing osekusenza azitshaye isifuba ngokuthi uyesatshwa kakhulu.
Ekuqaleni kwalumnyaka iphephandaba likazulu lakhuluma loDube owabika ukuthi loba nini engaphenduka esitikini edinga lo ongamliswa isicoco sakhe sokuba yintshantshu yenqindi e-Africa.
Kuzwakale ngokugcweleyo ukuthi uDube uselunywa yikungena esitikini. Kulabafakazi abaseduzane laye abathe uselolonga okuqinileyo kulezinsuku.
“UThamu ufuna ukuqhubeka ejika inqindi kungakho useqalisile ukugijima lapha lalaphaya esenzela ukuthi ahlale elungiselele loba yiwuphi umdlalo angawuphiwa,” kutsho omunye umngane kaDube oseduzane.
Ekhuluma loMthunywa, uDube uvumile ukuthi ‘usekhanuka’ ukulwa.
“Sengihlale isikhathi eside ngingadlali. Lokho akusindaba ezinhle ngoba sengifuna ukuthi ngidlale ngokupheleleyo,” nguDube lo.
Loba uDube ekhalela ukuphenduka, isifiso sakhe senqatshelwa yikuthi bambalwa abantu abasekela i-boxing kuleli njalo abahlawuleli labomanenja balumdlalo sebebalutshwana.
Isikhalazo salumdlali siza ngesikhathi uMphathintambo wezemidlalo kuhulumende uMakhosini Hlongwane ekhalaze ngokwehluleka kwenkokheli zenhlanganiso ye-Zimbabwe National Boxing and Wrestling Control Board.
UDube waba yingqwele yamadoda ajika inqindi ngo2009 lapho awisela phansi uJack Els weSouth Africa. Kuminyaka emibili edluleyo, wathathelwa ibhanti lakhe. Isizatho sokuthathelwa ibhanti kwaba yikuthi waswela umuntu angancintisana laye.
Kusenjalo, ilunga labaphathi bomncintiswano weWBA Pan-African title uStan Chrosto usekhulume kanengi ukuthi uDube sekumele athole umuntu wokulwa laye.
“Udubo olwabakhona yikuthi umdlali lo [uThamu] kazange athole umdlalo kusukela waba yintshantshu ngo2009.
Abe-WBA Pan African basitshela ukuthi kwakumele alwe phakathi kwenyanga eziyisithupha ethole isicoco.
“Isizwe sonke siyazi ukuthi uThamu waswela usekelo, okuyikho okwabangela konke lokhu,” kutsho omunye umqeqetshi owake wasebenza loDube.
Kusenjalo, kuphume omunye umbiko othi kulomdlali wakuleli uTinei Maridzo obephethe ibhanti leWBO African Super Middleweight Champion laye osehluthunelwe isicoco.
