uMthunywa
Lovemore Dube
OZATHATHA isicoco esikhulu esePPC 33 Miler mhlaka 7 Mabasa lonyaka uzahamba leUS$2 000 ngekhaya.
Umdlalo uphenduka ngemva kweminyaka emine imisiwe.
Owokucina ubungomnyaka ka2019 kwesekuvuka ubhubane lweCovid-19 ngomnyaka ka2020.
Ongumqondisi kwezokumaketha kunye lokuthengisa kunkampani le koBulawayo, eyiyo esekela njalo umncintiswano wokugijima ngemali amabanga amade uNkosana Mapuma ubike ukuthi sebephendukile ngomfutho omkhulu.
Uthe iPPC izafaka iUS$34 000 ezathathwa ngabanqobayo.
Ubike njalo ukuthi abazakuba ngabokuqala kwabaphila ngokugijima abathiwa ngama ‘Elite Athletes’ kubobaba labomama baziphiwa imali engange US$2 000.
“Abazanqoba bazaphiwa iUS$2 000. Abalitshumi kuzigaba zonke yibo abazathola imali le.
“Sizaba le-53KM, 21KM labagijima okokuzithokozisa abazaba leyabo imango ye10KM le 5KM. Silokujabula ukuthi siphenduka ngesizotha esikhulu esiphezulu,” kutsho uMapuma.
Uveze njalo ukuthi umdlalo lo usungulwe ngo1963.
Ubikele intatheli ebezisemhlanganweni lo ukuthi umjaho lo ungomunye owakhetha ukuthi abenza kuhle babe lethuba lokuyagijima umdlalo weComrades Marathon.
Uthe sebevumelane lenhloli zeWorld Athletics ukuthi bonke abazenza kuhle bavunyelwe kuWorld Half Marathon Championships.
“Sokwenziwe konke okumele kwenziwe ukuthi abagijima lapha bathathwe kuComrades Marathon,” kutsho uMapuma.
IComrades Marathon ingumango we 87KM ugijinywa umnyaka wonke kusukwa eThekwini kuyiwa eMaritzburg kolandelayo kube yiMaritzburg usiya eThekwini njalo ugijinywa ngabavela kuwo wonke amazwi.
Omele abaqoqa ezokugijima koBulawayo uWatson Madanyika uthe bayajabula ukuthi iPPC 33 Miler isiphendukile.
Ubonge abePPC ngomzamo wabo wokuthuthukisa ezokugijima.
Uphinde waveza ukuthi ukuba khona komncintiswano wokugijima lo uthuthukisa ezomnotho ngoba kuba labanye abavela kwezinye indawo ababuya ukuzolanda umdlalo lo.
“Lokhu kusekela ezokuvakatshelana kwezemidlalo. Abazabuya bazafuna indawo zokulala lokudla,” kutsho uMadanyika.
Uthe ngo2019 baba labagijimi abazinkulungwane ezingamatshumi amathathu (30 000) uthe lonyaka bakhangelele abazinkulungwane ezinhlanu (5 000).
