uMthunywa
Nkosilathi Sibanda
UMQEQETSHI weqembu lesizwe kumdlalo kanobhutshuzwayo uSunday Chidzambwa wethule amabizo abadlali afuna ukuhamba labo eGipite ngoNhlangula kodwa watshiya inengi ebelifunwa ngabantu.
Kuqembu leli, umqeqetshi ufisa ukuthi abadlali bayencintisa kunkezo yeAfcon, mhlawumbe bengaphuma lokungcono.
Kuza kuba labadlali njalo abazalithinta ngesikhathi isizwe sincintisa kumqhudelwano weCosafa ozaqhutshelwa kwele-South Africa, andubana kuyedlalwa eGipite.
I-Cosafa idlalwa kusukela mhlaka 25 kulinyanga kusiya ku 8 Nhlangula. Umcimbi omkhulu we-Afcon ukhona ekupheleni kwenyanga elandelayo.
Abadlali bakaChidzambwa laba bazaqala ukungena enkundleni ze-Afcon bedibana leGipite kumdlalo wokuvula umncintiswano.
UChidzambwa ukhethe abadlali abangu-34 encedisana labasekeli bakhe kuliviki. Abadlali abanengi batshibilikela phetsheya kwelizwe.
UElvis Chipezeze ubonakele laye ngemva kwesikhathi abalandeli bomdlalo bekhalaza ngokuthi abizwe.
Unozinti lo ubengakhangelwa ngitsho lalapho edlala kuhle kuqembu lakhe leBaroka FC eSouth Africa.
UThabani Kamusoko uphenduka eqenjini acina ukulidlalela ngo-2017 mhla amaWarriors edibene leLiberia.
Omunye ophenduka kulithimu ngemva kweminyaka eyisithupha nguTafadzwa Rusike oweqembu leZanaco kweleZambia.
Loba ekhethe abakhe, kulilungelo lakhe lumqeqetshi ongasachazanga ukuthi kungani etshiye abathile, ababonakala bedlala ngcono kulabakhe.
Ekhuluma lephephandaba likazulu umaneja wamaWarriors uWellington Mpandare uthe isinqumo esithethwe ngumqeqetshi labasekeli bakhe kumele sihlonitshwe, sisekelwe njalo.
“Abaqeqetshi bayazi abakwenzayo yikho sibathembile ukuthi basikhethele abadlali abazamela isizwe kuAfcon lakuCosafa.
“Bakhethe abadlali abangu-34 esikhangelele ukuthi balolonge anduba siphume leqembu elizancintisa, okwamanje asikaqalisi ukulolonga,” kutsho uMpandare.
Wazise ukuba abadlali bazangena enkambeni yokulolonga kusukela mhlaka 20 Nkwenkwezi.
Nansi ithimu kaSunday:
Onozinti: George Chigova, Edmore Sibanda, Elvis Chipezeze, Talbert Shumba
Imvimbi: Dennis Dauda, Lawrence Mhlanga, Jimmy Dzingai, Byron Madzokere, Alec Mudimu, Teenage Hadebe, Divine Lunga, Ronald Pfumbidzai, Tendai Darikwa
Esiswini: Danny Phiri, Marshall Munetsi, Marvelous Nakamba, Butholezwe Ncube, Tafadzwa Kutinyu, Ovidy Karuru, Khama Billiat, Kudakwashe Mahachi, Tafadzwa Rusike, Richard Hachiro, Talent Chawapihwa, Leeroy Mavunga, Knowledge Musona, Thabani Kamusoko, Rodwell Chinyengetere
Abagadli: Nyasha Mushekwi, Evans Rusike, Walter Musona, Tinotenda Kadewere, Knox Mutizwa, Admiral Muskwe
