uMthunywa
UJOEY Antipas uze wahlangana lakho kuligi yeNational First Division eSouth Africa lapho athole ukunqotshwa kwakhe kwakuqala ekuqembu le-AmaZulu.
UAntipas ubesegiya ngeliphambili lokhe waqalisa umsebenzi kuligi ngoNcwabakazi. Ngempelaviki edluleyo iqembu le-AmaZulu lidliwe yiFC Cape Town 2-1.
Umqeqetshi lo owake wakhuza iChicken Inn kuleli uthe uyangeke kabi ngokunqotshwa kwakhe njalo uthe isizatho sokudliwa kwe-AmaZulu yikuna kwezulu lomoya enkundleni.
“Umumo womkhathi udale ukuthi sehluleke ukudlala kakuhle ngendlela ebesihlele ngayo. Bekungumdlalo obekumele unqotshwe yithi. Umoya ubuvunguza kakubi yikho sehluleke ukunqoba,” kutsho uAntipas.
Uqhubeke wathi: “Bengicabanga ukuthi sizahlohla masinyane kodwa iFC Cape Town isiphangisele. Sesizabuyela ekhaya sihlele amacebo okunqoba, siphenduke sesikwazi okumele sikwenze.”
Ukunqotshwa lokhu sekwenze i-AmaZulu yemukwa esikhundleni sobukhokheli kungalane yeNational First Division. Iqembu leThanda Royal Zulu elake ladlalelwa nguPeter Ndlovu yilo eselikhokhela.
UAntipas usuke kuleli ngoNtulikazi elande umsebenzi omutsha ku-AmaZulu. Wasuka lomsekeli wakhe kuChicken Inn uPrince Matore. Bobabili laba bakhuza iChicken Inn yaze yathwala inkezo yeCastle Lager ngo2015.
Umaneja omkhulu we-AmaZulu uLunga Sokhela ubike ukuthi loba uAntipas enqotshiwe kumdlalo wabo leFC Cape Town, umqeqetshi lo nguye abamethemba ukuthi uzabafikisa kuligi ephakemeyo eyeAbsa Premiership.
“Lo ngumuntu ozayiphakamisa i-AmaZulu njalo uzancedisa ukuthi siphenduke kuPremiership ngesizini ezayo.” — Ubulembu
