uMthunywa
Fungai Muderere
UMDLALI wenguqu uCleopas “Balloteli” Dube usazisola ukuthi kungani waphuza ukulolonga leHighlanders nanko useqede amalanga ekuleliqembu kodwa akulanto ephumayo.
Ufike eqenjini edinga indawo yokudlala kodwa sekuvela ukuthi abaqeqetshi angeke bamnike ithuba loba kusaziwa ukuthi wake wayidlalela iHighlanders njalo ulethalenta ukwedlula abanye abadlali.
Iphephandaba likazulu libika ngokugcweleyo lamuhla ukuba omunye wabaqeqetshi baleliqembu utshele intatheli ukuthi uDube uthole sekulabadlali abakhethiweyo, okuyikho okwenza kubenzima ukuthi athole ithuba.
Omunye wabaqeqetshi beBosso ongafunanga ukuqanjwa ngebizo utshele iphephandaba likazulu ukuthi uDube sengaba lethuba loqhatshwa.
“Sisamkhangela sisiya phambili. Kulamathuba okuthi sengaqhatshwa. Sizalinda isikhathi esiyiso ukuthi senze isinqumo,” kutsho omunye wabaqeqetshi beBosso.
Isikhulumi seBosso uNozibelo Maphosa uthe uDube ubelomnyama nje, ngoba ufice abaqeqetshi sebethole abadlali.
“Ubezilolonga leqembu kodwa ufike ngesikhathi abaqeqetshi sebeluhambisile uluhlu lwabo lwabadlali. Nxa singathola indawo, abaqeqetshi bangahle bamcabangele okungcono. Silethemba kulokho,” kutsho uMaphosa.
UDube odume ngelithi Balloteli, ubeseqenjini leBotswana Premier Soccer League, iJwaneg Galaxy, iqembu elidlalelwa ngabanye abasuke kuBosso uNqobizitha Masuku loDaniel Msendami.
Ufike kuJwaneng Galaxy ngoNcwabakazi nyakenye.
Akucaci ukuthi kungani watshiya iqembu leBotswana phakathi komkhankaso weChampions League.
Ngaphandle kokudlalela iJwaneng Galaxy, umgadli lo uphinde wadlalela iBaroka FC leWitbank Spurs kuNational First Division eSouth Africa, ngaphambi kokuthi ayedlalela iSua Flamingoes eyeBotswana.
KuSua Flamingos ubedlala ngaphansi komqeqetshi ongasekho uRahaman Gumbo. IBosso isanda kwehlukana labagadli uStanley Ngala loWashington Navaya. Iqembu lakhetha ukugcina uLynoth Chikuhwa.
