uMthunywa
UMDLALI wenguqu wakuleli uTapuwa Kapini usebike ukuba useqeqetsha onozinti beqembu ayelidlalela iHighlands Park, loba egcizelela ukuthi usafuna ukuqhubeka edlala.
Ucabange ukubuyela “ekhaya” kuHighlands Park ngesikhathi esadinga iqembu angalidlalela kuPremier Soccer League (PSL).
UKapini, oleminyaka yokuzalwa engu-38 ngomunye wabadlali abachithwa liqembu leSekhukhune United ekupheleni kwesizini ka-2021/2022.
Ubekhona ngesikhathi iBabina Noko ingena kuDStv Premiership ekupheleni kwesizini ka-2020/2021. Ungene kuleliqembu ngemva kokuthengiswa kweHighlands, ethengwe yi-TS Galaxy ngo-2020.
Kumaviki adluleyo, uKapini uveze ukuthi akazimiselanga ukutshiya ibhola okwakhathesi phezulu kokuhanjelwa yiminyaka.
IHighlands idlala ku-ABC Motsepe League esabelweni seGauteng.
Tapuwa-Kapini
“NgikuHighlands Park manje. Kusekhaya lapha. Bangicelile ukuthi ngizobasiza ngiqeqetshe onozinti ngoba bahanjelwe ngumuntu obekade eqeqetsha lapha. Yikho lami kube lula ukuvuma ukuzosiza. Silesivumelwano sokuthi ngizatshiya nxa kukhona iqembu elingifunayo. Kuyahlala kungijabulisa ukufaka isandla kuleli iqembu,” kutsho uKapini.
KuHighlands uKapini ufice loSandile Khwela loSimphiwe Tshabalala ayedlala labo kuleli iqembu eminyakeni edluleyo. UKapini wafika eMzansi ngo-2006 ezovimbela iPlatinum Stars esuka kuHighlanders.
“Okwamanje ngilolonga onozinti kodwa ngokolwazi lwami lwebhola, ngifisa ukucina ngingumqeqetshi. Ngifuna ukufana loRoger de Sa laye owayengunozinti kodwa wacina esengumqeqetshi. Okwamanje kodwa angikucabangi lokho ngoba ngisafuna ukudlala. Ngabe ngiyayicabanga eyokuyekela ukuba sengilenkinga yokuzimuka. Ngisakulungele ukubuyela enkundleni,” kutsho uKapini owayengukaputeni weMaZulu FC.
