uMthunywa
Wayne Ncube
KUJABULE amakhosi amahle, umqeqetshi wabo enikezwa imvumo yokuthi angaqala umsebenzi wokuqeqetsha iqembu lakhe iloba engakatholi ichence leCaf A.
Iqembu leBulawayo Chiefs lithokoze kakhulu ngemva kokuphuma kombiko wokuthi umqeqetshi walo uThulani Sibanda uselakho ukuliqeqetsha lanxa engakatholi isithupha seCaf A.
I-Caf A isibe yimvimbi kubaqeqetshi abanengi nanko phela sebemiswe ukusebenza ngoba bengela mvumo yokuqeqetsha evela kunhlanganiso yeCaf.
Intatheli yephephandaba likazulu ikhulume lomqeqetshi weBulawayo Chiefs uThulani Sibanda otshengisele ukujabula kakhulu ukuthi usekhululekile ukuqeqetsha iloba engakayitholi iCaf A efunakalayo.
“Ngijabulile ngokuthola imvumo yokuqeqetsha kodwa ngizaqhubekela phambili ngilwisa ukuthola i-Caf A ngakho ngibonga abalandeli kanye labakhokheli beqembu abangazange balahle ithemba kimi.
“Kakhulu ngithanda ukubonga uFarai Tawachera onguye obephethe iqembu leli ngesikhathi abakhokheli bemupha isikhundla sokuthi aphathe ngibe ngumsekeli wakhe.
“Indlela iqembu lethu eselidlale ngayo wonke umuntu uzimisele ukuthi sinqobe singakhitshwa ku PSL,” kukhuluma uSibanda.
Intatheli iphinde yakhulumisana lomsekeli kaSibanda, uFarai Tawachera lapho agcizelele khona ngobudlelwano obuhle iqembu lamakhosi amahle eliziphethe ngalo.
“Izikhundla zijwayele ukwehlukanisa abantu kodwa ukubambana okuseqenjini leByo Chiefs kuyakhuthaza ukuba lethemba lokunqoba emidlalweni.
“Kangithandabuzi indlela uSibanda aqhuba ngayo iqembu njalo kuyinjabulo kuye wonke umuntu ukuthi usevunyelwe ukuqeqetsha, abadala bayatsho bathi ukunqoba yikusebenzisana,” kuchaza uTawachera ngendlela azizwa ngayo ngokuphiwa kukaSibanda imvumo yokuqeqetsha.
Abalandeli beByo Chiefs labo batshengisele ukuthaba ukuthi umqeqetshi uSibanda usephiwe imvumo yokuqeqetsha njalo, ekhuluma lentatheli uMnumzana Lameck Temera ongumlandeli weBulawayo Chiefs uthe:
“Ngalesi isikhathi sifuna lonke usizo esingaluthola ukuze singaphumi kuPSL ngakho kuyasijabulisa ukuvunyelwa kukaSibanda ukuthi aphinde aqeqetshe njalo,” kuphetha uMnu Temera.
