uMthunywa
UWILLARD Katsande owayengumdlali weqembu leKaizer Chiefs lakuqembu lesizwe, amaWarriors, ulakho ukuthathelwa indlu yakhe eseGoli, ebiza i-R2 million, ngenxa yokwehluleka ukubhadala izikwelede.
Kubikwa uKatsande wekela ukubhadala okwenyanga eziyisitshiya galombili.
Umdlali webhola lo, osewathatha umhlalaphansi utholwe elecala emthethwandaba omkhulu ePretoria, eGauteng.
Ngokubika kwamaphephandaba eSouth Africa kuliviki, kusabalale ukuthi umthethwandaba ubambe indlu kaKatsande, ese The Dunes Estates, eHomes Haven Extension, ukuze ithengiswe. Intengo efunakalayo ngeye-R1 667 418.15. Kubikwa indlu le kayizange ithole umuntu ongayithenga ngoLwesibili kuliviki.
Owesifazane ozethule ngokuthi nguNkosikazi Erasmus ohlala eKrugersdorp uthe akuzange kubelomuntu ofuna ukuyithenga.
“Silindele usuku olutsha lokuthi ithengiswe futhi,” kutsho umama lo.
UKatsande wayengomunye wabadlali ababehola imali ezwayo kuKaizer Chiefs. Wafika kuleliqembu Ngesizini ka-2011. Ngaleso isikhathi wayehola iR200 000 ngenyanga.
Ekusukeni kwakhe kuKaizer Chiefs ngo 2021, umdlali wenguqu lo ubeselodumo lokutayila, okungumsebenzi obumnikeza imali.-Ubulembu
