uMthunywa
Lovemore Dube
ABE-Beitbridge Hotel sebexolise izakhamizi zakule indawo ngokwehluleka ukuqhuba umdlalo wenqindi obekumele ubekhona ngenyanga kaMpalakazi.
Abehotela le babehlele ukuthi ngenyanga kaMpalakazi kuzakhumuka amazinyo endoda kundingilizi yenqindi eBeitbridge. Kodwa ukuqhutshwa komdlalo lo kwehlulwe yikuthi kusweleke inkokheli zomdlalo kunye labadlali kunye lokuna kwezulu.
UPeter Leondios uthembise ukuthi kumnyaka ozayo balethemba lokuthi bazaba lemidlalo embalwa.
Onguye umnikazi wendawo le, uLeondios uthe isifiso besikhona ukuthi abantu bakhonale bake bathokoziswe ngokutsha. Uthe ubebeke lemali eceleni esithi kungenziwa lumdlalo endaweni yakhe laye athuthukise umdlalo labasakhulayo.
“Besilaso isifiso sokuthi kuliwe egumeni lami siphakamise idolobho lethu. Kusuke kwaba lokumbalwa okwavukayo kwenza sangaphumeleli ukuba lomdlalo. Okwakuqala sazama labangane bethu bomdlalo ukuthi sivumelane ilanga sithe sesenzenjalo baya emazweni bathola kuqoqwe omunye koBulawayo kwahle kwasikhama.
“Sakhangelela u22 lo 23 kaMpalakazi kodwa lala amalanga asuka aqinelwa lizulu kumbiko evezwe yizanuse zomkhathi. Sokunjalo kusuke kwabanzima ukuthi sime ngelokuthi lonyaka kungaliwa eBeitbridge. Umlandu sizizwa silawo,” kutsho uLeondios.
Umdlalo lo ulabadlali abambalwa asebewudlala okokuzithokozisa njalo lokokuzama impilo eBeitbridge.
“Ngizwa ukuthokoza nxa ngibona edolobheni lethu silabasakhulayo abaphitsheka ngezemidlalo bebalekela ukuba semigwaqweni okulemfundiso engalunganga.
“Kumnyaka ozayo sizama ukuthi kube lesiphithiphithi esiphakamisa umdlalo labasakhulayo abakhangelane lenhlupho zokutshaphazwa ngokudakayo,” utsho njalo uLeondios.
ULeondios akumuntu oqalayo ukuphatheka kwezemidlalo.
Khona eBeitbridge useke waletha abama-darts le-pool ukuthi bazodlalela endaweni yakhe.
“Asisibo bantu abatsha kwezemidlalo, sesike saqhuba eminye imidlalo lapha,” kutsho uLeondios onguye njalo osekela iBulawayo Province ngenkezo yamaqembu amapholisa leBulawayo Amateur Football Association.
Lezi inhlanganiso usezisekele kusukela ngo1987 ethenga iRoyal Sunflower.
