uMthunywa
Nkosilathi Sibanda
ZIMBI indaba kumqeqetshi wodumo uRahman Gumbo ongene umnyaka omutsha ngokuzwa ukuthi usegunyulwe kuChicken Inn.
Isivumelwano salumqeqetshi leqembu lamaGamecocks siphele ngoMpalakazi womnyaka odluleyo. Okwamanje, ngokutsho kwabafakazi abaqotho abasebenza eChicken Inn bathe izikhulu zeqembu azifuni ukuvuselela ubudlelwano loGumbo.
Umqeqetshi lo wayetshelwe ukuthi nxa efuna ukugcina umsebenzi kuzamele abone ukuba iqembu liyathwala njalo inkezo yeCastle Lager. IChicken Inn yabayintshantshu yeligi ephakemeyo ngesizini ka2015 isaqeqetshwa nguJoey Antipas.
UMthunywa uzwe udletshana lokuba uAntipas uzaphenduka koBulawayo.
“Abadala bethimu bafuna ukuthi kuqhatshwe uAntipas ngoba nguye ababona engumqeqetshi owayezwisisa ithimu.
Singazi ukuthi kumbe kuzakuba lomunye ozadingwa kodwa uAntipas uthandwa ngabanengi,” kutsho umfakazi oqotho owazise iphephandaba likazulu ngaloludaba.
UGumbo ungene esihlalweni sobuqeqetshi ngesikhathi iChicken Inn ibizwa njengentshantshu zeligi. Ukusebenza kwalumqeqetshi kunconywe linengi labathandi lababukeli bomdlalo kodwa kukhanya iziphathamandla zeChicken Inn azikhwabithanga indlela asebenza ngayo.
Umqeqetshi lo uphinde wazigcolisela ibizo ngokwehluleka ukulandela imthetho yePSL kusizini edluleyo.
UGumbo wala wemba phansi ukukhuluma lentatheli kumidlalo eminengi, okwenza ukuthi iPSL imjezise. Kumdlalo waleliqembu leYadah Stars, umqeqetshi lo wavumela abadlali bakhe ukuthi bakhalale umdlalo kuhlandla lakuqala lenkezo yeChibuku. Kulandela lokho, iqembu lajeziswa nge$2 000 latshelwa ukuba alisoke lidlale kulinkezo ngomnyaka ozayo.
Loba egunyuliwe, uGumbo ubalelwa kubaqeqetshi abahlonitshwa kakhulu kuleli lakwamanye amazwe eAfrica.
