uMthunywa
UMQEQETSHI weSuperSport United uKaitano Tembo uthi uphoxekile esehluleka ukunqoba isicoco seMTN8 ngemva kokutshaya inkunzi zeSoweto, i-Orlando Pirates leKaizer Chiefs.
Iqembu likaTembo elibizwa ngokuthi “Amatsatsantsa A Pitori” likhale ngaphansi kweCape Town City FC lisehlulwa nge 4-1 sekukhahlelwa imbekwa kulumdlalo obusenkundleni yeMoses Mabhida.
Umdlalo lo ubuphele nge 0-0 emizuzwini engu-90, lasesikhathini esengeziweyo.
UTembo, ophuma eZimbabwe ngokuzalwa uthe akwehli kahle ukuthi iqembu lakhe lanqoba iOrlando Pirates leKaizer Chiefs kodwa wasephikwa yizinto kalula.
Amatsatsantsa A Pitori ehlula iBucs nge 4-2 sekukhahlelwa imbekwa kuhlandla lama-quarter final.
ISuperSport idlulele phambili yahlangana leChiefs kabili. Kowokuqala zadlala ngokulingana kwaba ngu 2-2, kwathi kowesibili Amatsatsantsa anqoba nge 1-0.
Ziye kulumdlalo iSuperSport kuyiyo ebithwelwe ngeqoma ngenxa yokuthi yiyo ebivikela lesi isicoco eyayisinqobe itshaya iCity nge 4-2 sekukhahlelwa imbekwa enkundleni efanayo.
“Ngiphoxekile ukuthi sehlulekile ukuqedela umsebenzi omuhle ebesiwuqalile. Kubuhlungu ukufika kulesi isigaba besewehluleka ukunqoba. Iqiniso yikuthi asidlalanga kahle, sehlulekile ukugcina ibhola. ICape Town City idlale kahle kulathi, ngakho kuyifanele ukunqoba lesi isicoco,” utsho kanje ngemva komdlalo uTembo.
Ngokutsho kukaTambo, iSuperSport izofunda kokwenzeke ngoMgqibelo. Uthe emdlalweni olandelayo amaphutha bazobe sebewalungisile. “Singenza ngcono kakhulu kulalokhu esikwenzileyo. Siyafunda njalo emidlalweni esiyidlalayo, ngingathi njengamanje okubalulekileyo yikuthi sikhohlwe okusehleleyo, sikhangelele emdlalweni wethu olandelayo njengoba sizodlala lePolokwane City emdlalweni we-Absa Premiership,” kutsho uTembo. — Ubulembu