uMthunywa
YiNtatheli kaMthunywa
UMQEQETSHI weChippa United uNorman Mapeza uvumile ukuthi ubephethwe luvalo mhla iqembu lakhe lidibana leOrlando Pirates ngempelaviki.
Ezinkulu zase-Soweto zinqobe nge 2-1 kulumdlalo weligi ye-Absa obusenkundleni ye-Nelson Mandela Bay.
Okunikeze inkinga lovalo kuMapeza yikuthi ubelungiselele ukudlala leqembu elingabambekiyo kulezi insuku. IPirates isiqhube imidlalo eyisithupha ingehlulwa njalo isinqobe imidlalo emine ilandelana, ngaphansi kobukhokheli bukaJosef Zinnbauer.
Abafana be-Chilli Boys bebelwela ukubuyela eguyeni lokunqoba ukuze bengabuyeli ezembeni lokukhitshwa kuligi lapho uMapeza ayisuse khona.
Imbali yemidlalo iyakuveza ukuba iChippa United ayiqalanga kuhle iligi yalonyaka kodwa ngokuza kukaMapeza isizamile ukuthi ivuke. Inkinga zimhlasele uMapeza kulandela ukudliwa yiPirates nanko lumdlalo uze iqembu lisanda kwehlulwa yiPolokwane City nge 2-0. Kwemithathu imidlalo edluleyo, lumqeqetshi wenelise ukuqoqa imizuzu emihlanu ngaphambi kokuthi atshaywe yiSuperSport United nge 3-0 ngempeviki edluleyo.
Impumela le ibeka iChippa kunombolo yesi-12 ku-logu iphethe imiklomelo engu-22. Okwamanje iqhele ngemiklomelo emihlanu kulawo alwela ukungayi ehlathini.
Inkinga ngokunqotshwa yiPirates yikuthi iChippa United izabe isisondelela emsileni njalo lokuthi kungenzeka axotshwe uMapeza.
Phela umqeqetshi wokucina obesebhentshini bedlala lamaBhakabhaka, uClinton Larsen, waphoselwa emnyango ngemva kokwehlulwa nge 2-1.
Layo limpumela yayilandela eminye eyayingemihle.
UMapeza ebuzwa ngokuthanda ukuxotshwa kukasihlalo weChippa, uSiviwe Mpengesi, uthe: “Yonke indawo nxa ungumqeqeshi siphila lakunje.
“Nxa kungangisebenzeli lapha ngeke ngibe ngumqeqetshi wokuqala ukulahlekelwa ngumsebenzi. Ngitsho lase-Europe abaqeqetshi abaphezulu bayalahlekelwa ngumsebenzi ngenxa yempumela emibi. Ibhola limayelana lempumela kodwa okwamanje ngicabanga ukuthi sihamba kahle. Angikhathazwa yilutho. Nxa kukhona okwenzakalayo kuyabe kuyinto ejwayelekileyo ebholeni.”
Uthe kuzamele balungise amaphutha abawenzayo benqotshwa yiPirates.
“Sibe lomdlalo omuhle esigabeni sakuqala njengoba sikwazile lokwakha amathuba. Esigabeni sesibili asizange sivale kahle emuva ekubeni emidlalweni yethu edluleyo udonga lwethu belungenye yezindawo eziqinileyo,” kutsho uMapeza.
Ngalumdlalo iChilli Boys igubhe iminyaka elitshumi yasungulwa. UMapeza uthe ngeke akhulume ngomkhosi wokuthakazelela iminyaka le.
“Asikhulume ngemidlalo ezayo kuqala bese sikhuluma ngemigubho. Angiqali ukuba seqenjini elihlanganisa iminyaka lasungulwa,” kutsho lumqeqetshi odabuka eZimbabwe.
