uMthunywa
Nkosilathi Sibanda
ABASACATHULA kumdlalo webhola lenyawo bazathola ithuba lokutshengisa ithalenta labo enkundleni, kumqhudelwano kaNomsa “Boyz” Moyo Under 13 Tournament, ozaqhutshwa ngoMgqibelo eRaylton koBulawayo. Umqhudelwano lo usufikise iminyaka emithathu.
UMoyo, ongusaziwayo ohlonitshwa kakhulu kunguqu yabesifazane, uselesikhathi eside encedisa ekuthuthukisweni kwabadlali abasakhulayo.
Lonyaka kuzabe kulamaqembu asuka koBulawayo, Gwanda, Binga kunye leVictoria Falls, ngokutsho kwabaqoqi bemidlalo le.
Ekhuluma lentatheli yeZimpapers Sports Hub, uMoyo uthe uhlose ukuqoqa imidlalo edibanisa abasakhulayo njalo ufuna ukuthi afinyelele, aphinde aguqule impilo yenengi labadlali laba.
Ngesikhathi ehlela umqhudelwano lo, uthe wananzelela ukuthi abantwana abasakhulayo abalethalenta kunguqu, ikakhulu abaphuma endaweni ezisalele emuva, kumele basekelwe ukuze bengaphambuki empilweni.
“Ngakhuthazwa ngemva kokubona intsha yethu enengi, elethalenta ilahlekelwa yikukhanya. Isizukulwane esitsha sidonsa kanzima ukuthola abeluleki abangakhulumisana labo ngezinga elilinganayo. Ngokubona lokhu, ngabeka isingqumo sokuthi ngibe ngomunye ozaletha ukukhanya.
“Isikhathi esinengi silahlekelwa ngabadlali ngenxa yezidakamizwa lotshwala. Njengabantu abadala, sijwayele ukwahlulela kulokuthi sizwisise ukuthi yini abakhangelane layo.
Abantwana kwezemidlalo badinga ukuqondiswa njalo yilokho engichitha isikhathi sami esinengi kukho,” kutsho uMoyo. Uthe uphezulu komkhankaso wokulwisana lokusetshenziswa kwezidakamizwa.
“Ngokuhamba kwesikhathi, sengibe lengxoxo labadlali abasakhulayo ngendlela okumele baziphathe ngayo.”
