uMthunywa
YiNtatheli kaMthunywa
UMGADLI weOrlando Pirates uTendai Ndoro uyala ukukhuluma ukuthi uhlose ukuhlohla amabhola amangaki kulisizini, nanko uphikelela ngokuthi lokho kuzaya ngokuthi iqembu lakhe lidlala njani.
Kulandela ukuhlohla amabhola amahlanu kumidlalo emibili, uNdoro uhlaselwe zintatheli zibuza ngenhloso yakhe yokuvuthela umambule. Uthe yena empilweni yakhe kafuni ukuzithwalisa nzima ngokutsho ukuthi uzahlohla amabhola amangaki.
Iphephandaba likazulu lixhumane loNdoro ebulenjini ngoLwesithathu lapho abike ukuba kaphangi lutho njengoba isizini yeAbasa isaqalisa.
“Angifuni ukuzithwalisa nzima. Ngisatshayela phansi okwamanje ngoba ngingavele ngikhulume ukuthi ngifuna ukuthi ukuhlohla amabhola athize, kuzaba nzima kimi,” kutsho uNdoro.
Izazi zenguqu labalandeli benguqu yeSouth Africa bakholwa ukuthi uNdoro kungenzeka atshaye amabhola angamatshumi amabili kumbe enelise ukufika angamatshumi amathathu.
Umdlali lo uyala lokhu.
“Abantu bacabanga okwabo. Kuhle ngoba bangifisela ukuthi ngidlale ngokuphezulu. Engihlose ukukwenza yikuthi ngidlale kuhle leqembu leOrlando Pirates. Ngeke ngithi ngizahlohla angu-20 ngoba ngingedlulisa lapho njalo angeke ngithi athile ngoba ngingacina ngihlohle angu-10.
“Okuqakathekileyo yikubambana leqembu lami. Nxa iPirates idlala kuhle inqoba, lami yikho engikufunayo,” kutsho lumdlali, osephenduke waba yisithandwa kuBhakaniya.
