uMthunywa
B D Ndlovu
SIQEDISA isahluko sethu sesitshiya galo lunye. Silandela uMzilakawulandelwa lapho abasebebaleke khona behlanhlatha amahlathi bezimisele ukuyafika emizini yeKheswa lapho ababekhangelele khona ukuthola ukudla.
Endleleni lapha bahlangana lezidumbu ezasezisonakala. Lapha-ke yayikhona into edabula inhliziyo, evusa umhelo oleleyo.
Phakathi kwezidumbu lezi kwakulosane olwaselukhale zaze zoma qha, lwalu lokhe ludonsa ingono kanina ngethemba lokubona sekuphuma uchago, kodwa lutho uchago ukuphuma esidunjini lapha lengono le yayisize yasubuka.
UMzila wazizwa efikelwa yisihelo sokuthi mhlawumbe ahle nje aludubule usana lolu kulokuthi lube phakathi kosizi olungaka.
Wayelokhu nje eyeme esihlahleni ezibuza eziphendula yonke imibuzo engaka.
UMaleveni-ke yena wasondela kulezo zidumbu efisa ukuphenyisisa ukuthi kambe zingabe zazibulewe ngohlamvu kumbe zazibulewe ngenye indlela.
Wayeziguqu guqula kancane nje ezama ukukhangelisisa amanxeba la ukuze labo benelise ukulandela umkhondo wesitha sebelolwazi olupheleleyo ngembangela yokufa kwalaba bantu.
Okwenzakala lapho laye umalandisa kasakuqondisisi wacina nje omunye wakhe elokhu ephenya phenya ezidunjini.
Waphaphama ezibona ebanjwe yizandla zomuntu wesifazana, owesifazana lo wayekhanya engumuntu olomzimba omkhulu.
Owesifazana lo wamthembisa ukuthi wayezasila kulobu buhlungu ayephakathi kwabo, wayezizwa nje kuyibuhlungu umzimba wonke engazi nje lokuthi kwakutheni, wayesehluleka lokuzwisisa ukuthi kuyini okwakwenzakele kuye.
Esalibele nje kwangena omama ababili ababegaxe amathambo ezinyoka bethwele lomgqomo wamanzi ayethunqa intuthu, khonokho nje bambambisana bamsondeza embizeni lapha, owesifazana lowo wakhupha ilembu elimnyama waqala ukumthoba umzimba wonke.
Wawuhlaba wawulawula umkhosi ngoba nje ubuhlungu ayephakathi kwabo wayesehluleka ukubuqamba langegama.
Kancinyane nje umqondo wakhe wawusubuya wakhumbula nje ukuthi wacina esizwa umdumo omkhulu, okusobala ukuthi kwadubuka ibhomba lapho elalisethiwe yisitha.
Sinanzelela amaqhinga esitha abuhlungu njalo angatshengisi uzwelo kanye lenhliziyo egcwele ubuntu.
Kambe nxa kuzatshiywa usane olumunyayo phakathi kwezidumbu lubulawelwe lonina kambe kungathiwa yibuntu bani obunje, lukhale luhawule kungela muntu olusizayo ngitsho lusetshenziswe njengewemusi lokuthiya inhlanzi, kuthiywa ngomphefumulo womunye umuntu.
