uMthunywa
Silo Charles Dube kugwalo olwalotshwa nguBernard D Ndlovu
Zimbi indaba. Itshabhini kaMaDube isivaliwe ngemva kwesididi esenzakala lapho kubotshwa uZwanelukafudu loMoyo abalwa baphosa babulalana. Amantombazana wonke ayesebenzela uMaDube bethokozisa amadoda ayenatha etshabhini leyo abotshwa, kwathi abanye abanjengoSehliselo basinda ngokubaleka ngentunjana.
Ukubotshwa kwabantu labo kukhuthazwa yizakhamizi zelokitshini lePhumula ezasezidiniwe ngobubi obabusenzakala endlini kaMaDube.
Okwesikhathi esinengi babeswele ukuthi bangenzani ngalolo daba ngoba ngenxa yokubola kwesizwe lamapholisa kuphilwa impilo yokuthengana ngobungane, kwakunzima ukuyimangala leyo ndaba enkambeni yamapholisa.
UMaDube wayewathenga amapholisa ngemali, ngotshwala ngokudla langamapendeka ukuthi bengavali itshabhini yakhe.
Kuthiwa okungapheliyo kuyahlola ngoba mhla sekuvuke udlakela phakathi kwezidakwa ezazinatha kuleyo tshabhini izakhamizi zePhumula zikhokhelwa ngukhansila wazo uMlotshwa zala ukuthi amapholisa ahambe loZwanelukafudu loMoyo loMaDube kuphela amapendeka lawo ayehlala lapho engabotshwanga.
Abantu bahle bagcwala phakathi kweguma likaMaDube beqoqoda ezindlwaneni ezazicitshwe izibane zilamapendeka labangane bawo besilisa.
Labo abala ukuvula bezwa ngamatshe sekutshaywa amafasitela. Kubikwa atshaywa aphela du amafasitela endlini yonke kaMaDube. Phakathi kwakufe iziboniboni lamagilazi aligugu.
Impahla ezinengi zazebiwe. Konke lokhu ngumvuzo wempilo engalunganga yokuxhwala.
Njengenjwayelo omakhelwane bakaMaDube bahlekela ezindlini zabo besithi: “Kambe yiyo indlu yobubi enjeya kumbe asiboni yona? Kungabe yikho okungapheliyo okuthiwa kuyahlola lokhu?” Betsho benyenyeza engutsheni zabo.
USehliselo, indodakazi kaMaMlambo eyabanjwa ngamandla ukuthi iyesebenzela uMaDube, ngomunye owaba lamathamsanqa ayinqaba.
Wayephume ngesamagundwane ekuhlaselweni kwabo ngabantu. Wenela ukuvula isivalo sendlwana ayekuyo, mamo!
Abantu bamhlangabeza sanyosi ezilolaka. Bamdabulelana okwamaganyana. Ngesikhatshana isigqoko, ipitikoti, ibhulugwana laphakathi kwasekuzimvuthu. Abantu bazenzela konke abakuthandayo emzimbeni wakhe.
Ngenhlanhla enkulu wenelisa ukudlubulunda aphunyuke amatshumitshumi ezandla. Weqa ucingo kanti kabuzanga elangeni ngokungale.
Wazithela kwesinye isigangi esamdonsela engotsheni kamakhelwane kaMaDube salwisa ukumbamba iganyavu.
Wancedwa ngumbhobho wamapholisa owakhalayo singakayi ngaphi ngokuganga lokho leso sigebenga. Ekunyomukeni kwakhe lapho uSehliselo wagijima wayazithela endlini eyayingemuva okwethusa abanikazi baleyondlu ngoba wayenqunu uSehliselo ngaleso sikhathi.
Ngemva kwesikhathi sesaphela leso sididi sihlangana laye uSehliselo esengakibo evakatshelwa lijaha lakhe elilipholisa uMoyo elalimthembise ukumthatha.
UMoyo utshela uSehliselo ukuthi icala lakhe lokulwa loZwanelukafudu beselufuna ukumxotshisa umsebenzi. Uthi ukwaziwa ngabantu kuyanceda. Uveza ukubola okugcwele emsebenzini wesipholisa.
Abantu ababotshwa bagwetshwe ngabangaziwayo njalo abangalabangane kuleyo misebenzi.
UMoyo ubuveza sobala lobu bubi bokubola ngoba uthi ipholisa ebelisebenza icala lakhe ngumngane wakhe omkhulu njalo wake wamnceda ngezinto ezithize.
Ngakho-ke udinge izizatho lezizathwana esenzela ukuthi icala lelo libe lesigwebo sokuhlawula hatshi ukuthi ayehlala entolongweni.
Ukuvalelwa kwakhe entolongweni okwenyanga eziyisithupha bekuzakutsho ukwesulwa kwakhe emsebenzini. Kubotshwa abangela bantu bokubamela. Kulungile lokho na?
