uMthunywa
Charles Dube – Kuliviki siqhubeka ngodaba lwethu olumayelana lohlupho oluhlangana labantu bemadolobheni, ikakhulu ontanga njalo lubadonsela ebubibi lekuziphatheni butshapha. Sitshiye uSehliselo esezinikela ukuyancedisa uMaDube ekuthengiseni utshwala etshabhini yakhe ngoba sekungene utshaba ngakwabo. Sekulendlala eyesabekayo.
Izikwelede lazo sezibhahile esikolo kanti lendlu yakwabo isithenjiswa ukuthathwa ngemva kwesikhatshana nxa ingabhadalelwanga.
USehliselo lanxa evuma okutshiwo ngunina ukuthi ayesebenzela uMaDube, uyatsho ukuthi yena impilo yematshabhini kayithandi, igcwele izixhwali njalo abantu bahlala bebotshiwe bayelala esitokisini. UMaMbambo, unina kaSehliselo kazi iqiniso elithi: “Okungapheliyo kuyahlola.” Nxa uSehliselo ekhuluma ngokwesaba ukubotshwa kwabantu, unina uthi kakhohlwe ngalokho. Uthi uMaDube ngujam’jeqe omnyama njengempisi.
Uyaqhubeka uMaMbambo ethi uMaDube akulapholisa lalapha angalaziyo njalo kungaba ngumhlolo wamasi akoSibindi aliwa yizinja nxa ungabona itshabhini yakhe iqoqodelwa ngamapholisa. Kuthiwa amadoda ukuyengana.
UMaMbambo utshela uSehliselo ukuthi into enkulu yikuziphatha kwakhe phakathi kwalezo zixhwali azitshoyo.
Umbuzo esilawo yikuthi umuntu angaziphatha njani phakathi kwezixhwali ezihlala zisilwa zikhuluma lenhlamba ezesabekayo.
UMaMbambo umkholwa kakhulu uMaDube okwenza ehluleke ukubona ukuthi uthumela umntanakhe uSehliselo endaweni enzima. Uthi itshabhini kaMaDube ilomthetho, ubudlwangudlwangu abuqalwa. Umuntu onjalo uphuma emnyango njalo angalugxobi futhi lapho. Akusiqiniso lokhu ngoba sithola oZwane lukafudu labo Moyo besilwa njalo kuphuma lenhlamba ezesabekayo lapho. Unina kaSehliselo uyawubulala umkhumbulo lowo ngokuthi yena nxa efuna umsebenzi ozaba phathisa kakhulu empilweni yabo kakhohlwe ngokunengi.
USehliselo kodwa umangaliswa yibunengi bemali azayihola yena ezasebenza amalanga amabili kuphela ngeviki.
Unina nxa esizwa uSehliselo ekhuluma ngalokho umtshela ukuthi akhumbule ukuthi uzabe esebenza emini lebusuku. UMaMbambo ukhuthele ekufakeni uSehliselo esilaheni sobunzima ngoba kuzamkhipha ezikweledeni.
USehliselo ucina esevumile isikhuthazo sikanina athi usezawemukela-ke umsebenzi lowo kodwa ethi kuzambuyisela emuva njengoba ebhala i O-level kumnyaka ozayo.
UMaMbambo ngalolosuku uSehliselo evumile ukuya sebenza etshabhini kaMaDube kuthiwa walala emanzi te ngokuthaba. Wayebona ubunzima ayephakathi kwabo esebunqobile. Wayesezavukela kuMaDube esiyathatha imali yesikwelede sendlu kanye lekaSehliselo yesikolo njengokuthembisana kwabo. Umbaxambili uMaMbambo ngoba kuthiwa lanxa wayengakuthandi ukuthi uSehliselo ayesebenza etshabhini, pho athini enguhwayibhetshu nje?
Ulethemba uMaMbambo ukuthi izinto zingamhambela kuhle uzamsusa uSehliselo etshabhini kaMaDube. USehliselo njengabanye ontanga laye ufakwa phakathi kohlupho abekade engalukhangelelanga. Uhlupho lwangekhaya yilo olwadonsela uSehliselo ebubini.
