uMthunywa
Nkosilathi Sibanda
UMQEQETSHI wodumo kumdlalo wengqindi eZimbabwe uPhilip ‘Striker’ Ndlovu udinga usizo lokuthi ayenelise ukuphila lomkhuhlane wemvukuzane osufike kusibanga esiphezulu.
UNdlovu, oleminyaka yokuzalwa engu-66, kubikwa uhlaselwe yimvukuzane esifike esigabeni esifuna ukuthi abone odokotela mihla yonke.
Kubikwa umqeqetshi lo wayefuna imali engange-US$3 000 ukuthi ayehlinzwa kodwa kwehlula, okuyikhona osekudale ukuthi imvukuzane alayo iye kwesinye isigaba.
Odokotela kubikwa kwakumele benze okuthiwa yi- trans-urethral resection okudume ngokuthi yiTurp.
Ngokuswelakala kwemali, uNdlovu uyehluleka ukuzenzela.
Okwamanje uNdlovu usendlini yakhe eJingeni Flats eMakokoba.
Esaqinile, umqeqetshi lo waba lodumo elolonga abadlali be-boxing ababalisa uModecao Donga, Masotsha Ntshali, Thamsanqa Dube loElvis “Bulawayo Bomber” Moyo.
Ngokubika kwesihlobo sakhe uPrecious Zhawu, kuthiwa uNdlovu okwamanje ufuna iUS$120 ngeviki eyokuthi ahlale esiyahlolwa ngodokotela.
“Ukusimo esibi ngoba imvukuzane le isifike kusigaba sokucina osekumenze wathola umkhuhlane ohlasele izinso obizwa ngokuthi yi-chronic kidney disease.
