uMthunywa
Innocent Kurira
IQEMBU lakoBulawayo ele-Arenel Movers, eliqabuka ukudlala kuligi yeCastleLager, selilomqeqetshi omutsha uFarai Tawachera, okuveza ukuthi lizimisele ukuthi lincintisane lamanye adlala kuligi ephakemeyo.
I-Arenel Movers bekumele idinge umqeqetshi omutsha ngoba lo obekhuza iqembu ku-Division One, uKudzai Mhandire kalasithupha esimvumela ukuthi aqeqetshe kumidlalo yePremier Soccer League.
Okwamanje, uMhandire usephiwe omunye umsebenzi wokuba ngumaneja weqembu kuthi uNkosilathi Nkomo uzakuba ngumsekeli kamqeqetshi.
UWonder Pepere uzaphatha umsebenzi wokuqeqetsha onozinti. Kuqula labaqeqetshi leli, ozabona ngokuqinisa imizimba yabadlali nguBoga Ndebele.
UTawachera ulembali enkulu yokuqeqetsha kumhlubulo ongezansi yelizwe. Uke waqeqetsha iTsholotsho, Bulawayo Chiefs leBulawayo City. Ngesizini edluleyo uqede engumsekeli kamqeqetshi kuChicken Inn.
Esethula loludaba kuZimpapers Sports Hub, umqondisi wenhlelo ku-Arenel uJuma Phiri uthe iqembu lizaqala ukulolonga ngoMgqibelo, lilungiselela isizini yeCastle Lager.
“Siqhatshe uTawachera ukuthi abengumqeqetshi omkhulu, uMhandire usengumaneja. UMhandire uzaqhubeka ngokuphakamisa izithupha zakhe. Iqembu lizaqalisa ukulolonga kusasa,” kutsho uPhiri.
Ngesizini edluleyo inengi labaqeqetshi benguqu lavalelwa phandle kulandela ukuguqulwa kwemithetho yabaqeqetshi elawula ukuthi lo ofuna ukuqeqetsha kuPSL kumele aphathe isithupha se-CAF A.
Kusenjalo, akwaziwa loba i-Arenel izenelisa na ukuthi igcwalisise imidlalo yayo kuPSL njengoba iqede isizini ka-2023 isadalala, ikhala ngemali.
I-Arenel ingene kuPSL lamaqembu amatsha abalisa iChegutu Pirates, Tenax FC leTelone FC.