uMthunywa
YiNtatheli kaMthunywa
UMQEQETSHI weFC Platinum uNorman Mapeza usenze kuhle kumidlalo elitshumi lanhlanu ilandelana njalo ubika ukuthi uzayiphakamisa iFC Platinum kumkhankaso wayo wenkezo yeCastle Lager lazo zonke ezizakuba khona.
UMapeza ubikele uMthunywa ecingweni ukuthi angeke kwenze ukuthi izimbamgodi zeFC Platinum zidliwe lula kumidlalo eseleyo.
Umqeqetshi uqale isizini le elethimu exegayo kulandela ukusuka kwabadlali abedlula isithupha besiyadinga amadlelo aluhlaza kwezinye indawo.
Izazi zeligi yakuleli besezicabanga ukuthi uMapeza uziphosele egodini ngokuvuma umsebenzi lo kungela ngitsho abadlali abazwayo. Okwanzakale kuleliqembu kusukela ngoNkwenkwezi kuvuse amehlo abanengi abakade bengacabangeli ukuthi iFC Platinum ingadlala ibhola elizwayo.
Umqeqetshi lo uthe ngokuqina abayikho, izimbamgodi zizaloba imbali lonyaka ngokukutula amathimu aziwa ngokuthi azinkunzi zeligi.
“Ngileqiniso lokuthi abadlali bami sebesazi ukuba sizimisele ukuba liqembu elizaqeda isizini le lihlonipheka. Ngakubika kudala ukuthi angisuki kuFC Platinum singakaphakamisi inkezo enkulu enjengeyeCastele Lager. Okwamanje angifuni ukukhuluma okunengi, kodwa asimeleleni ukunqoba kwethu,” kutsho uMapeza.
Kusizini yeCastle PSL yomnyaka odluleyo, iqembu leZvishavane leli litshibilike laba yinsika yethimu le eqede iyintshantshu yenkezo yeChibuku. Inkezo yeChibuku yiyo eyanikeza iqembu leZvishavane leli ithuba lokumela isizwe kumidlalo ye-Caf Confederations Cup.
UMapeza wetheswe ingqobe yokuthi aqhube ithimu le iphindele kumkhankaso weAfrica.
Uqhubeke wathi: “Ukuba seqenjini leFC Platinum kuyangikhukhumeza ngoba ithimu le ilekusasa elihle. Liqembu elisenhliziyweni yami. Angeke ngiyendawo. Khathesi inhlonso yami ikumidlalo yenkezo yeCaf Confederations. Akula okunye.”
Umqeqetshi lo ukhulume ngokufanayo ukuthi iqembu lakhe selikhangelele phetsheya ukudlala kuhle lamanye amathimu eAfrica.
“Abadlali bethu bonke abaphakamise iFC Platinum akumelanga sibalahle. Kulalabo asebekhulile ngeminyaka yokuzalwa kodwa babalulekile. Abadlali abasakhula bafunda okunengi kibo.
“Ithuba lokuyancintisa eAfrica liyakhuthaza kakhulu. Umdlali munye ngamunye uyazi ukuthi lesi yiso isikhathi sokuziphakamisa,” kutsho uMapeza.
Lonyaka uMapeza ubechinsa ukuyaqeqetsha kunkezo yaphezulu eqoqwa yinhlanganiso yeConfederation of African Football. Uthe loba wake waqeqetsha iqembu lesizwe amaWarriors, ukungena kunkezo yeCaf Confederations kumtshiye esengumqeqetshi ololwazi olungcono.
Imidlalo yeCastle Lager PSL:
NgoMgqibelo: Tsholotsho FC v FC Platinum (White City),Flame Lily FC v ZPC Kariba (Rufaro), Harare City FC v Triangle United (Rufaro),Chapungu FC v Buffaloes FC (Ascot)
NgeSonto: Caps United v Highlanders (National Sports Stadium),Whawha FC v How Mine FC (Ascot), Dongo Sawmill FC v Hwange FC (Vengere),Chicken Inn FC v Dynamos (Barbourfields).
