uMthunywa
Nkosilathi Sibanda
KULOSOMABHIZIMUSI osuka eGwanda eSelonga osesungule iligi yebhola labomama ngemva kokunanzelela ukuthi banengi abalesiphiwo esidinga ukuhlakulelwa kulindawo.
Imidlalo yenguqu yabomama le ihlanganisa labantwana abasezikolo zakulindawo njalo izasekelwa yinkampani yeLumalang Batho, ekhokhelwa ngusomabhizimusi uDavid Moyo.
UMoyo uthe ukhangelele ukuthi kusiyavulwa izikolo kuqoqwe umqhudelwano ozadibanisa amaqembu wonke, kube leligi yebhola labomama kulindawo.
“Ngikhangelele ukuthi ngiqoqe imidlalo yokuncintisela inkezo esiqintini ngoba kukhanya begcwele abadlali abasuka lapha abangenza izimanga kunguqu.
“Inkezo le engifuna ukuyisekela ngihlose ukuthi iphakamise abantu bakithi, ikakhulu omama abadlala unobhutshuzwayo. Lesi yisibongo esivela kunkampani yami iLumelang Batho. Sibonga usekelo oluvela ebantwini baseSilonga ngesiphatho sabo ngesikhathi ngisungula ibhizimusi lami. Ngilesifiso sokuthi ngiphakamise abanye abantwana bakithi ukuze labo babe yisibane esizaletha ukukhanya kule indawo,” kutsho uMoyo.
UMoyo uthembise ukuthi uzancedisa amankazana alesiphiwo ukuze benelise ukuba lekusasa elihle ngokusungula iligi.
“Sekuzasungulwa iligi yebhola labomama kule indawo. Lokhu kuzaphathisa ukuthi abesifazane bonke bengaphelelwa yiziphiwo zabo ngoba behlala belolonga njalo nje.
“Sifisa ukuthi kube leqembu elizasuka emaphandleni liyencintisana lamanye asemadolobheni,” kutsho uMoyo.
Ngomnyaka odluleyo usomabhizimusi lo uhlanganise amaqembu asuke koBulawayo lalawo aseSilonga kumqhudelwano osekelwe yinkampani yakhe.
Kulinkezo kwakunxuswe amaqembu abalisa iSelonga Secondary, Street Set, New Orleans kanye leBuvuma Secondary.
Iqembu leStreet Sect yilo elabayintshantshu njalo lithole umvuzo we-kit yebhola lamasokisi akhona kwalandela iNew Orleans.
