uMthunywa
KUBE yiyo yodwa indaba esegudwini ukuqhatshwa kukaJose Mourinho ukuthi abengumqeqetshi omkhulu weqembu leManchaster United kuliviki.
UMourinho oleminyaka engu-53 yokuzalwa, uphenduka eNgilandi ukuyathatha umsebenzi omutsha kumaRed Devils axotshe uLouis Van Gaal esanda ukuthwalisa ithimu le inkezo yeFA ngempelaviki.
Okumqoka ekuqhatshweni kukaMourihno yikuthi amaphephandaba aseNgilandi abika ngokuzethemba ukuthi umqeqetshi lo usefake isicelo sokuthi inkokheli zeMan U zimnikeze imvumo yokuthi athenge abadlali ngemali ebiza i200 miliyoni yamaPound. Phakathi kwabadlali abasemcabangweni kaMourihno nguRonaldo loZlatan Ibrahimovic.
Iqembu leMan U selikhiphe i250 miliyoni yamaPound ithenga abadlali kumasizini amabili adluleyo.
NgoLwesithathu intatheli zenguqu eNgilandi zibike ukuthi uMourihno ufake njalo isicelo sokuthi aze lomsekeli wakhe uRui Faria asesebenze laye kusukela ngo2001. Omunye njalo ozabuya loMourhno nguSilvio Louro ololonga onozinti. Umqeqetshi wodumo lo uzaphinda njalo acele ukuthi iMan U ingaxotshi uRyan Giggs obencedisa uVan Gaal Kusizini edluleyo.
UGiggs loMourihno babonakale baxoxisana ezitaladeni zaseLondon kuliviki.
Kusenjalo, inengi labadlali labaqeqetshi benguqu kwele-Europe bazise inkokheli zeMan U ukuthi zenze icebo elihle ngokuqhatsha uMourihno. Bakhona abasole indlela okuxotshwe ngayo uVan Gaal kodwa inengi lincome ukuza komqeqetshi wodumo.
Usaziwayo kunguqu yeNgilandi laseFrance uThierry Henry nguye owaphuma phambili echothoza umsebenzi kaVan Gaal. Kuliviki ugcwale kumaphephandaba egcizelela kumaqhuzu weMan U uEd Woodward ukuthi aphangise aqhatshe uMourinho.
UHenry uthe nxa iMan U ifuna ukuncintisela inkezo yeBarclays lokuyadlala ku-Uefa Champions League ngesizini ezayo kuzamele iqine ngokuqatsha uSpecial One.
“IManchaster United idinga ukuphumelela. UMourinho nguye ongakwenza lokhu.
“Ngibona angathi uMourinho ulokhe engumqeqetshi ololwazi lobuciko baphezulu kunguqu,” kuloba uHenry kuphephandaba le The Sun eNgilandi.
IMan U ibingasela elinye icelo likamqeqetshi njengoba omakhelwane bayo iManchaster City izaqeqetshwa nguPep Guardiola. Umqeqetshi lo nguye owayefuneka ngamehlo abomvu enkundleni yeOld Trafford.
UMourinho sekuyisikhathi ekhangelelwe ukuthi uzaqeqetsha iManchaster United. Ebuzwa ngekusasa yakhe kunguqu, uMourinho uthe akula angakutsho.
UMourinho uxotshwe kuChelsea ngoMpalakazi kulandela ukunqotshwa kwalithimu engadlali kuhle kulisizini. — Ubulembu
