uMthunywa
YiNtatheli kaMthunywa
UMPHATHINTAMBO wezemidlalo uMakhosini Hlongwange usekhethe umhlonitshwa oyingcitshi kwezomdlalo we-boxing kuleli uModercai Donga ukuthi abeyingxenye yalabo abazabamba intambo ekuqhutshweni kwalumdlalo kuqula leZimbabwe National Boxing Board.
UDonga usegxile kweze-boxing okweminyaka eminengi njalo ungumqondisi weqembu elikhankasela lumdlalo eleBig Fish Promotions. Ungena kubhodi le engumntu owaziyo okumele akwenze, kukhangelelwe ukuthi alethe ulwazi leziqondiso kwabanye bakhe ababalisa uRichard Hondo, uAmbassodor Zenzo Nsimbi, uThomas Kambuyi, uSipho Mnyamana loStella Motsi
Isaziso sikaHlongwane silandela isinqumo somthetho wesihlanu sokuqhutshwa komdlalo lo kuBoxing and Wrestling Act (Chapter 25.02). Kumbiko ayithumele intatheli, uHlongwane ubike ukuba iqula elitsha lalumdlalo liphiwe umlandu wokuguqula umdlalo likhangelisisa ukuvuswa kwengatsha lokubona ukuthi umdlalo uyaphumulela kuzo zonke izigaba.
“Ibhodi entsha le inikezwa umlandu wokuthi ilungisise umdlalo okweminyaka emithathu elandelayo. Umdlalo we-boxing kumele udlalwe kuzinga eliphezulu.
“Ibhodi le kumele iphakamise omama abadlali lumdlalo ngokubaphathisa lokubakhuthaza. Kumele idinge usekelo, iphakamise isisindo sabadlali kanye lokuncedisa ngesikhathi esifaneleyo konke okufunwa ngabadlali,” kutsho umbiko kaHlongwane.
UHlongwane ucele abalandeli labathandi bomdlalo we-boxing ukuthi basekele amalunga ebhodi entsha le.
“Ngithanda ukwethula isibongo esikhulu kubhodi ebikhona ebilamalunga abalisa uPaul Nenjerama, uTsitsi Muzuva, uPatrick Mukondiwa, uBenson Dube loEugina Chidakwa. Laba bene umsebenzi omuhle ngesikhathi besemsebenzini.
