uMthunywa
YiNtatheli kaMthunywa
UKUHLOHLA amabhola amanengi kulemali!
Usaziwayo kwezamabhizimusi lakunguqu kuleli uKenneth Mhlophe uzanikeza umdlali ozahlohla amabhola afika angu-22 umvuzo wemali ekupheleni kwesizini ka-Division One kumhlubulo ongezansi yelizwe.
UMhlophe, ongumaqhuzu wenkampani yeNokel Security ubikele uMthunywa ukuthi ukhathazekile ngenani eliphansi lamabhola ahlohlwa ngabagadli bamathimu la ngakho ukubone kulicebo elihle ukuthi akhuthaze abadlali ngomvuzo wemali angange-$300.
Inkampani yeNokel Security isileminyaka isekela uDivision One kulumhlubulo njalo yiyo njalo ehlawulela umvuzo we$150 wenyanga zonke womdlali odlala okwedlula bonke.
Ngesizini edluleyo, umdlali owedlula bonke kwabangu Ishmael Wadi owahlohla amabhola angu-10, edlalela iBulawayo Chiefs.
UMhlophe uthe lonyaka abagadli kumele benze ngcono kuloWadi. Kulisizini umdlali osaphezulu ngamabhola nguNhlanhla Ndlovu osedlalela iHighlanders. UNdlovu usuke kuqembu le Amagagasi ekhokhela iligi ngamabhola ayisitshiya galombili.
Kubadlali abasatshibilika kuDivision One, okukhanya betshisa phambili kwenkundla nguLungile Nyathi odlalela i-Amagagasi FC osehlohle ayisithupha. Abanye asebehlohle inani elifanayo nguFortune Nkomazana oweBantu Rovers loCarlos Dube weVictoria Falls Tigers.
“Umdlali ozafikisa amabhola angu-22 ngizamnikeza i$300. Ngikhethe ukwenza lokhu ngoba ngilomqondo wokuthi ngifake abafana ingqobe yokuthi bahlohle amabhola amanengi. Inkampani yeNokel Security ilokukholwa ukuthi kulethalenta elikhulu kubhola likaDivision One kulumhlubulo njalo ithalenta leli kumele lisekelwe.
“Ngokunjalo sizaqhubeka siletha imivuzo kulabo abadlali abenza kuhle.Kuqakathekile ukuthi inguqu yeligi le isekelwe ukuze abadlali benelise ukuthi baziphakamise baphinde bakholisise lababukeli,” kutsho uMhlophe.
UMhlophe ngomunye wabosomabhizimusi abasekele inguqu kaDivision One kusukela kudala njalo ukuphatheka kweNokel Security kumdlalo wenguqu kukhangelelwe ukuthi kuhuge amanye amankampani alandele indlela efanyo.
