uMthunywa
UFUNGA uyagomela uBenni McCarthy ukuthi ngeke ayenzele umsebenzi olula i-Orlando Pirates ebonakala isendleleni ekhangele ukuthwala isicoco seligi ngemva kweminyaka eyisikhombisa yasicina.
I-Pirates esalelwe yimidlalo emibili kuligi, ihlezi esiqongweni ngemiklomelo engu-53. Ngemva kwayo kukhona iMamelodi Sundowns elemiklomelo engu-50, besekulandela iBidvest Wits ngangu-48.
Iqembu likaMcCarthy, iCape Town City libambe indawo yesine ngemiklomelo engu-47 kulandela ukutshovela iChippa United ngasemsileni we-logu, liyihlula nge 2-0 ngempelasonto.
EzikaMcCarthy bezize emdlalweni zisanda kuthathelwa imiklomelo emithathu yikomithi yePremier Soccer League (PSL), ethole leliqembu leBloemfontein lilecala lokungaqinisi ezokuphepha emdlalweni lo ongaphelanga phakathi kwamathimu womabili kumaviki adluleyo.
ICity isidlale leSundowns leWits kumidlalo etshiye umqeqetshi uMcCarthy elesibindi sokusongela iPirates.
Iguqise iZitshudeni ngo 3-2 ekuhambeni, yatshaya iSundowns nge 2-1 eKapa.
Umdlalo wayo leZimnyama use-Athlone Stadium ngoMgqibelo ngo-3 ntambama. Abathandi bamaqembu la bazenelisa lokubukela umdlalo kumabonakude.
“Sifuna ukubanyakazisa. Ngicabanga ukuthi langeviki elizayo ithuba elikahle lokwenza lokho. Kumele sinqobe, sidlale ibhola laphezulu kubonakale ukuthi kuzokwenzakalani,” kutsho uMcCarthy.
Ukhuluma kanje lumqeqetshi, iPirates itshayela phezulu njengoba isikwazi ukuqoqa imiklomelo engu-12 emidlalweni emine edluleyo. Empeleni iqembu likaMilutin “Micho” Sredojevic, alikahlulwa emidlalweni eyisithupha ilandelana, emibili yayo eliyidlale ngokulingana.
“Ngatsho ukuthi kuWits, iSundowns lePirates sifuna ukubashukumisa balwe bodwa. Sifuna uye emidlalweni yokucina umncintiswano weligi. Sifuna kufike umdlalo wokucina omunye ekhangelele ukuthi awine.”
Nxa iPirates iyinqoba imidlalo yayo emibili eseleyo izaqeda ilemiklomelo engu-59 esiqongweni. ISundowns yona izocina ilemiklomelo engu-59 uma inqoba yonke imidlalo emithathu eseleyo.
Kodwa iSundowns isalinde isigwebo sayo ngokudlalisa uWayne Arendse kungafanelanga, okungenzeka iphucwe imiklomelo.
— Ubulembu
