uMthunywa
Sikhumbuzo Dabengwa
Siyahlangana njalo bafundi kuzifundo zethu zempilo.
Sike sadingida udaba lobuvila lobunzima bempilo yomuntu olivila.
Nxa sinanzelela ayisiwo wodwa amavila atholakala ekuphileni kwethu.
Bakhona abantu kumbe sithi bakhona abafundi abakhutheleyo ezimpilweni zethu.
Lababantu bayajabulisa ngoba konke abakwenzayo kubapha impumela enhle okwamagama.
Ivila liyenyanyisa njalo alithandeki ikanti umuntu okhutheleyo uyathandeka.
Imisebenzi yakhe iyabukeka.
Akesikhangele okwenziwa ngumakhuthala.
Ukuvuka
Umuntu okhutheleyo uvuka kule!
Uvuka emathathakusa enze imisebenzi yakhe.
Kaphunyelwa lilanga elele.
Uyavuka lumuntu abale kusaqandelela.
Ukuvuka luphawu oluveza ukuba umuntu ukhuthele.
Kubi bafundi ukulala umuntu aze akleze impisi.
Lapha uyabe ulele obukaBhuka ubuthongo ungaze wenza lalutho ekuphileni.
Sivezile ukuba ubuthongo yilifa lenja ngoba yona ilakho ukuzilalela ingenzi lutho.
Asivukeni bafundi sisebenzise izandla zethu.
Sibale ukuze ikusasa lethu libe ngelihle.
Ukusebenza nzima/Gadalala
Ukusebenza nzima okulengqondo kuhle bafundi njalo kupha isivuno esihle kumisebenzi yezandla kanye lasezingwalweni kithi thina esifundayo.
Asibali ekuphileni ngoba abadala bathi umuntu udla izithukuthuku zakhe.
Ngakho siyalikhuthaza ekuphileni lasekufundeni, kudinga ukuba umuntu abe ngu ‘Vuk’ uzenzele,’ ngoba ungabe ulokhu uvilapha, ulayezela, kuzakuba ngesembila eyaswela umsila ngokulayezela.
Ngakho konke esikwenzayo asikwenzeni ngokukhuthala okukhulu ukuze sibe lesivuno esihle.
Ukusebenza imisebenzi iphelele
Kukhona abanye bethu abathi bephiwe imisebenzi bangayenzi bayiqede.
Lokhu kudala ukuba abantu bangabi lemisebenzi elempumela enhle ngoba bengaqedi abakwenzayo.
Ukusebenza uphutshe indima ngolunye uphawu lokukhuthala. Ivila voxo aliphutshi lutho.
Silabo ezikolo abahamba babambabambe imisebenzi isalele endleleni.
Akukuhle lokhu bafundi ngoba lekuphileni sesisebenza sizabe singabahluphayo abangenzi lokhu okuyabe kufanele bakwenze.
Kubi lokhu bafundi asikwekeleni.
Nxa siphiwe umsebenzi wokuya kwenza ngekhaya asifundenini ukuyenza siyiqede ngothando size siyibalisise sesiyiqedile.
Ukuthumeka
Ebuntwaneni bethu kubakhona izikhathi lapho esicelwa khona ukuba senze eminye imisebenzi.
Akukhathalekile kusesikolo kumbe kungekhaya.
Umuntu okhutheleyo ubonakala ngokuvuma ethunywa.
Ukuvuma uthunywa yikusukumela phezulu kungabikhona izitshengiselo zokudonda kanye lokunengeka.
Inengi lethu alisathumeki bafundi. Abanye ufica sebezondile umlomo usule!.
Akukuhle lokhu bafundi.
Umntwana kumele azifundise ukuba kumele avume ukuthunywa ngabanye.
Kulabo abakhutheleyo bethumeka siyabonga.
Qhubekani, isibongo sikhona.
Asihlanganeni kwelizayo bafundi.
